Ադրբեջանցի քաղաքագետ. «ԼՂ հիմնախնդրի կարգավորման համար մենք օգտագործում ենք մեր ներուժի 10 տոկոսը»

Այս մասին է հայտարարել ադրբեջանցի քաղաքագետ Զարդուշտ Ալիզադեն՝ REGNUM-ին տված հարցազրույցի ժամանակ։ Թեման Գաբալինյան ռադիոլոկացիոն կայանի վարձավճարի բարձրացումն էր, որը վարձում է Ռուսաստանը. Բաքուն որոշել է 7 մլն դոլարից վարձը դարձնել 15 մլն։

Խոսելով այդ կայանի դեմ հանդես եկող ադրբեջանական ուժերի մասին՝ Ալիզադեն նշել է, որ դրա հիմնական պատճառն այն է, որ վերջիններս դիտարկում են Ռուսաստանին՝ Ղարաբաղյան հակամարտության ոսպնյակով. «Փաստ է, որ Ռուսաստանն աջակցում է մեր թշնամուն, մեր տարածքները զավթողին։ Սակայն եթե մենք հրաժարվենք տրամադրել այդ կայանը Ռուսաստանին, մենք շատ ավելի մեծ վնաս կկրենք՝ վատթարեցնելով մեր հարաբերությունները մեր հյուսիսային հարևանի, գերտերության և ԵԱՀԿ ՄԽ համանախագահներից մեկի հետ։ Պետք չէ նաև մոռանալ, թե ինչքան հնարավորություններ չի օգտագործում Ադրբեջանը ղարաբաղյան հակամարտությունն իր օգտին լուծելու համար՝ սկսած խաղաղ կարգավորումից, ռազմական, տեղեկատվական և տնտեսական ճանապարհներով։ ԼՂ հիմնախնդրի կարգավորման համար մենք օգտագործում ենք մեր ներուժի 10 տոկոսը միայն»։