Վիտալի Բալասանյանն իրական ընդդիմադիր էր. Ալեքսանդր Իսկանդարյան

Այն ամենը, ինչ ես տեսա մամուլում, ինձ մոտ տպավորություն ստեղծեց, որ մամուլը մտածում է, թե Ղարաբաղը միջազգային կառույցներին երախտապարտ լինելու համար է։ Բայց ինձ թվում է, որ պետք է խոսել ոչ թե այն մասին, թե ինչպես են գնահատել ընտրությունները, այլ թե ինչպես են դրանք անցել և ինչ իրականություն են արձանագրել։ Նման տեսակետ այսօր լրագրողների հետ հանդիպմանը հայտնեց քաղաքագետ Ալեքսանդր Իսկանդարյանը։ 

Նրա գնահատմամբ, Ղարաբաղի նախագահական ընտրություններում պայքարը բարդ է եղել։

«Վիտալի Բալասանյանն իրական ընդդիմադիր էր, պայքարը բարդ էր, ընդդիմությանը հաջողվեց միավորվել։ Բալասանյանը հավաքել է ձայների մեծ քանակ, որը երկու–երեք անգամ գերազանցում է նախորդ ընտրություններում ընդդիմադի գործչի հավաքած ձայները։ Սա արդյունքն է նրա, որ ընդդիմությանը հաջողվեց միավորվել»,– ասաց Իսկանդարյանը։

Բանախոսը նշեց նաև, որ ցավոք Ղարաբաղի հինգ քաղաքական ուժերից ոչ մեկը չսատարեց Բալասանյանին, բայց ավելացրեց, որ գնահատելի էր այն փաստը, որ անհատ պատգամավորներ սատարում էին Բալասանյանին։

«Կա տպավորություն, որ հնարավոր է ընդդիմադիր խմբակցության ձևավորում լինի։ Սրա դեմ իշխանություններին դժվար կլինի հաշվի չնստելը, իսկ սա էլ կբերի Ղարաբաղյան քաղաքական միջավայրի ընդհանուր պատկերի փոփոխության։ Ղարաբաղը փոխվում է, և սա այն դասն է, որը ստացան ընտրություններից»,– ասաց Իսկանդարյանը և հավելեց, որ Ղարաբաղի նախագահական ընտրություններն անցան շատ թեթև, եղան խնդիրներ, վարչական ռեսուրսի չարաշահում, բայց անցան մեղմ։