ՄԱԿ-ի բանաձևը չի արտացոլում Սիրիայում առկա իրավիճակը. Վիտալի Չուրկին

Ուրբաթ օրը ՄԱԿ-ի Անվտանգության խորհրդում Սիրիայի հարցով քննարկումները կշարունակվեն։ Նախատեսվում է, որ Անվտանգության Խորհրդի անդամ երկրները քննարկելու են Արաբական հանրապետությունում ՄԱԿ-ի դիտորդական առաքելության ապագան։ Հիշեցնենք, որ նախօրեին բանաձևի քննարկումն արգելափակել են Չինաստանը և Ռուսաստանը, քանի որ փաստաթուղթը ենթադրում էր Սիրիայի դեմ պատժամիջոցներ, ընդհուպ մինչև ռազմական միջամտություն։ Այնուամենայնիվ, բանաձևի ռուսական նախագիծը Մոսկվան ստիպված եղավ քվեարկությունից հանել, քանի որ արևմտյան երկրները հրաժարվեցին աշխատել դրա հետ:

Անդրադառնալով Անվտանգության խորհրդում հակասությունների էությանը՝ ՄԱԿ-ում Ռուսաստանի մշտական ներկայացուցիչ Վիտալի Չուրկինը նշեց, որ նախագիծը տարբերվում էր ծայրահեղ միակողմանիությամբ։ Պատժամիջոցների և ճնշման սպառնալիքները հասցեագրված էին բացառապես Սիրիայի կառավարությանը. «Սա արմատապես հակասում է ժնևյան փաստաթղթի ոգուն և չի արտացոլում Սիրիայում առկա իրավիճակը։ Բացի այդ, փոխարեն նպաստելու Սիրիայի կարգավորմանն ուղղված միջազգային հանրության ջանքերին, ինչպես նախատեսված է հունիսի 30-ին ժնևյան համաժողովին ընդունված փաստաթղթով, տապալված նախագծի նախաձեռնողները ձեռնամուխ եղան նպաստելու սեփական օրակարգի ընդունմանը, Անվտանգության խորհրդում առճակատման սրմանը»:

Ռուսական նախագիծը հանվեց հենց Անվտանգության խորհրդում իրավիճակը չբարդացնելու համար։ Ռուսական պատվիրակությունը,ՄԱԿ-ի դիտորդների ներկայությունը Սիրիայում համարելով կարևոր՝ սկզբունքորեն չի բացառում, որ այսօր կքվեարկի բանաձևի օգտին, ինչը նախատեսում է Սիրիայում ՄԱԿ-ի առաքելության գտնվելու ժամկետների երկարաձգում։

Սակայն այսպիսի որոշումը ևս կարող է չարժանանալ արևմտյան երկրների հավանությանը։ Այս մասին վկայում է, թերևս, Սպիտակ Տան մամուլի քարտուղար Ջեյ Քարնիի հայտարարությունն առ այն, որ ԱՄՆ-ն չի աջակցի ՄԱԿ-ի առաքելության մանդատի ընդլայնմանը առանց Սիրիայի դեմ կոշտ բանաձևի։