Արցախի և Հայաստանի ժողովուրդների միջև խնդիր չեմ տեսնում և չեմ ուզում տեսնել․ Տարոն Սիմոնյան

Այսօր վարչապետ Նիկոլ Փաշինյանը իր ելույթի ժամանակ ասաց՝ «Ակնհայտ է, որ կան նախկին կոռուպցիոն համակարգը ներկայացնող կոնկրետ ուժեր, ովքեր փորձ են անում կյանքի կոչել իրենց կողմից նախկինում կիրառված բանաձևը. այն է՝ տարաձայնություններ, հակասություններ և նույնիսկ թշնամանք հրահրել Արցախի եւ Հայաստանի ժողովրդի միջև՝ «Բաժանիր, որ տիրես» տրամաբանությամբ, նախկինում իրենց կողմից թույլ տրված կոռուպցիոն հանցագործությունները կոծկելու, արդարացնելու նպատակով: Հայաստանում կան քաղաքական ուժերի ներկայացուցիչներ, ովքեր օրումեջ հայտարարում են, թե մեր կառավարությունը դավադրություն է պատրաստում Արցախի դեմ և մեր կառավարությունը նենգ մտադրություններ ունի Արցախի դեմ: Անկեղծ ասած, ես անընդհատ մտածում եմ, թե ինչը կարող է դրդել այդ մարդկանց անել հայտարարություններ, որոնց սուտ լինելու մասին գիտեն իրենք»։

Այս հայտարարության վերաբերյալ ԼՈՒՐԵՐ․com-ը զրուցեց Աժ «Լուսավոր Հայաստան» խմբակցության պատգամավոր Տարոն Սիմոնյանի հետ։

-Պարոն Սիմոնյան, Նիկոլ Փաշինյանը այսօր հայտարարեց, որ իշխանության ընդդիմախոսները ապատեղեկատվություն են տարածում։ Այդ ամենը համարելով դավաճանություն, քաղաքականության մեջ նկատել ե՞ք այդ գործընթացը։

-Եթե առկա է նման տեղեկություն, որ ինչ-որ հայեր փորձում են ներքաղաքական հարցերը օգտագործել Հայաստանի և Արցախի հասարակաությունների մեջ սեպ խրելու համար, այո՛, դա դավաճանություն է և խստագույնս պետք է դատապարտվի, իսկ նման անձինք էլ ենթարկվեն պատասխանատվության։ Ազգային խնդիրները երբևէ չպետք է փոխկապակցվեն ներքին խնդիրների հետ։ Ազգային խնդիրների հարցում, յուրաքանչյուր հայ պետք է միակարծիք լինի և որևէ անձնական կամ ներքաղաքական շահերով չպետք է առաջնորդվի և ազգային շահերը չօգտագօրծի ի շահ իրեն։ Դա անթույլատրելի է, և ես դատապարտում եմ, եթե նման խնդիր ծագի։

-Այսօր վարչապետը հստակ արձանագրեց, որ նման երևույթ գույություն ունի, և՛ ինքը, և՛ Դուք նշում եք, որ դա ազգային անվտանգության հարց է։ Չե՞ք կարծում, որ այս հայտարարությունը պետք է արվեր ԱԱԾ-ի կողմից։

-Եթե այդպիսի հարց կա, ապա ԱԱԾ-ն արդեն իսկ պետք է ունենա համապատասխան տեղեկատվություն և համապատասխան, անհրաժեշտ գործողությունները կատարի, որպեսզի հետագա հնարավոր զարգացումները կանխվեն։ Ես չեմ տիրապետում որևէ ինֆորմացիայի, դրա համար տեսական մակարդակում կարող եմ ասել, որ պետք է բոլոր գործողությունները անել՝ բացառելու համար ազգային խնդիրների օգտագործումը ներքաղաքական կամ անձնական շահերի համար։

-Վերջին շրջանում զորավարժություններ են ընթանում և՛ Արցախում, և՛ Ադրբեջանում, հնարավո՞ր է նոր պատերազմի կանխատեսումներ անել և ենթադրել, որ վարչապետը այս ելույթով ապահովագրեց իշխանություններին հետագա քննադատություններից։

- 1994-95 թվականներից այս կողմ մենք կանգնած ենք պատերազմի վտանգի առջև, այնպես չէ, որ այսօր վտանգ կա, վաղը չկա։ Այդ վտանգը մշտական է և դա մեզ պետք է զգոն պահի, որպեսզի մենք պատրաստ լինենք, որևէ պարագայում չկորցնենք այդ զգոնությունը, որովհետև մեր հակառակորդը ինքն է հայտարարում, որ Հայաստանի և Արցախի հետ պատերազմական իրավիճակում է գտնվում։ Դա պետք է մեզ համար բավարար լինի, որ պատրաստ լինենք հնարավոր զարգացումների։

-Վերջին շրջանում շատ է քննարկվում Արցախ-Հայաստան հարաբերությունների վատթարացման հարցը։ Երկու նախագահների Հայաստան գալը, երեկ Վիտալի Բալասանյանի հետ տեղի ունեցած դեպքը, ըստ Ձեզ, կարո՞ղ են ազդել այդ հարաբերությունների վրա։

-Ես էլի եմ կրկնում, որ ներքաղաքական գործընթացները որևէ պարագայում չպետք է օգտագործել ի վնաս ազգային խնդիրների և նպատակների լուծման։ Պետք է հնարավորինս խուսափել անգամ փոքրիկ կետերից, որոնք ունակ են վերաճել և մեծանալ։ Հետևաբար, այն գործընթացները, որոնք տեղի են ունեցել չպետք է դիտարկել որպես երկու հասարակությունների միջև առաջացած խնդիր։ Ես խնդիրներ չեմ տեսնում և չեմ ուզում տեսնել, բայց ամեն դեպքում պետք է զգուշավորություն ցուցաբերել, որ հանկարծ այդ փոքր խնդիրները չվերածվեն մեծի։ Լրագրողների դերն էլ բացառապես կարևոր է, որպեսզի նրանք իրենց լծակներով փոքր խնդիրները չդարձնեն մեծ։