Yahoo!-ի նոր գլխավոր տնօրենը 5 տարում կվաստակի 100 մլն դոլար

Yahoo! ընկերության նոր գլխավոր տնօրեն Մարիսա Մայերը 5 տարվա ընթացքում կվաստակի 100 մլն դոլար, հաղորդում է Reuters-ը՝ վկայակոչելով Yahoo!-ի պաշտոնական ներկայացուցչին:

Yahoo! ընկերության նյութերի համաձայն, Մայերի բազային աշխատավարձը կկազմի մեկ տարվա դիմաց 1 մլն դոլար: Սակայն այս գումարից զատ, նոր ընկերության գլխավոր տնօրենը կստանա մինչև երկու միլիոն դոլար բոնուսներ: Մայերի պայմանագիրը նախատեսում է նաև 14 մլն դոլար, որպես փոխհատուցում Google-ից Yahoo! տեղափոխվելու համար: Մայերը կկարողանա նաև մասնակցել օպցիոն ծրագրին՝ ստանալով Yahoo!-ի բաժնետոմսերը և 42 մլն դոլար արժողությամբ այլ օպցիոններ:

Հիշեցնենք, որ հուլիսի 17-ին ճգնաժամ ապրող Yahoo! ինտերնետային կորպորացիան հայտարարեց նոր գլխավոր տնօրենի նշանակաման մասին: Այդպիսի ընտրություն վերլուծաբանները չէին սպասում. ընկերությունը կգլխավորի Մարիսա Մայերը, ով վերջին ժամանակներs գլխավորել է Google-ի դիրքավորման և քարտեզների ծառայությունների բաժինը: Ինչպես նշել է The New York Times-ը, այս մակարդակի կառավարչի և ինտերնետ ծառայությունների ոլորտում նման փորձառություն ունեցող մասնագետը մեծ ձեռքբերում է Yahoo!-ի համար, որը վերջին տարվա ընթացքում փոխել է չորս գլխավոր տնօրեն:

Վերջին գլխավոր տնօրեն Սքոթ Թոմսոնը ազատվեց պաշտոնից իր կենսագրականում կրթության մասին անճիշտ տվյալների հետ կապված սկանդալի պատճառով: