Ներառականության սկզբունքը` առաջնահերթություն

ՀՀ կրթության և գիտության նախարար Արմեն Աշոտյանն ու ՀՀ աշխատանքի և սոցիալական հարցերի նախարար Արտեմ Ասատրյանն այսօր
ստորագրել են համատեղ հրաման` «Հատուկ կարիքներ ունեցող երեխաների համար հատուկ հանրակրթական ուսումնական հաստատություններում միասնական կառավարում ու սոցիալական պաշտպանություն ապահովելու գործողությունների ծրագրի» վերաբերյալ: Համաձայն հրամանի՝ հաստատվել է համապատասխան գործողությունների ծրագիր, որի նպատակն է երեխաների կրթական և սոցիալական կարիքների գնահատման միջոցով առաջիկա տարիներին հատուկ հանրակրթական ուսումնական հաստատություններում ստեղծել երեխաների իրավունքների պաշտպանության առավել նպաստավոր պայմաններ և նոր հնարավորություններ, ինչպես նաև հատուկ կրթության կարիք ունեցող երեխաներին ապահովել սոցիալական պաշտպանության երաշխիքներով: «Ստորագրված փաստաթուղթը մի յուրօրինակ ճանապարհային քարտեզ է մոտակա տարիներին նախատեսվող միջոցառումների համար, որը ենթադրում է հատուկ կրթության կարիք ունեցող երեխաների կարիքների գնահատում, վերջիններիս՝ սոցիալիզացման բարձր աստիճանի ապահովում, հասարակությանն ինտեգրվելու և նրա լիարժեք անդամը դառնալու անարգել իրականացում, ինչպես նաև պետության՝ առավել նպատակային աջակցություն և օգնություն: Գործողությունների ծրագրի կարևորագույն կետերից է նաև զատել սոցիալական կարիքներից դրդված երեխաների ընդգրկումն այն ուսումնական հաստատություններում, որոնք նախատեսված են բացառապես հատուկ կրթության կարիք ունեցող երեխաների համար: Վերջին տարիներին իրականացվող կրթական բարեփոխումների շնորհիվ հատուկ հանրակրթական ուսումնական հաստատություններում սովորող երեխաների թիվը նվազել է՝ շնորհիվ ներառականության սկզբունքի կիրառման. այսօր հանրապետությունում գործում է ներառական կրթություն իրականացնող շուրջ 95 դպրոց, որոնց թիվն ամեն տարի ավելանում է շուրջ 15-ով»,-նշել է Արմեն Աշոտյանը՝ հավելելով, որ նշված գործընթացում նախարարության կարևորագույն գործընկերներից են ՀՀ աշխատանքի և սոցիալական հարցերի նախարարությունը, ինչպես նաև խնդրով մտահոգ միջազգային և տեղական հասարակական կազմակերպությունները, որոնք սոցիալական գործընկերության շրջանակում, համագործակցում են նախարարության հետ:

ՀՀ աշխատանքի և սոցիալական հարցերի նախարար Արտեմ Ասատրյանն իր հերթին նշել է, որ երեխաների պաշտպանության խնդիրը ՀՀ կառավարության գործողություների ծրագրում գերակա խնդիր է, որի համատեքստում, ըստ նախարարի, երեխաների կարիքների գնահատման հիման վրա պետք է ավելի նպատակային և հասցեական քաղաքականություն իրականացվի, և ստորագրված փաստաթղթով գործունեության նոր էջ է բացվում:
Համատեղ հրամանով հաստատվել է գործողությունների ծրագիր, համաձայն որի՝ 2012-2013 թթ. նախատեսվում է իրականացնել մի շարք գործողություններ, մասնավորապես.

• Կլրամշակվի «Հայաստանի Հանրապետության հանրակրթական ուսումնական հաստատություն սովորողի ընդունելության, տեղափոխման և ազատման կարգը», որով կսահմանվի հատուկ հանրակրթական ուսումնական հաստատությունների յուրաքանչյուր տիպ կունենա ընդունելության իր չափանիշները:
• Մի շարք հատուկ հանրակրթական ուսումնական հաստատությունների կառաջարկվի վերակազմակերպել որպես հատուկ դպրոց-կենտրոններ և այլընտրանքային ծառայություններ իրականացնող հաստատություններ: Հատուկ դպրոց-կենտրոնները կկազմակերպեն նախադպրոցական կրթություն և կհանդիսանան մեթոդաբանական և ծրագրերի մշակման ռեսուրս կենտրոններ ներառական կրթություն իրականացնող դպրոցների համար:
• Հատուկ հանրակրթական ուսումնական հաստատությունների լիազոր մարմին կճանաչվի ՀՀ կրթության և գիտության նախարարությունը:
• Կիրականացվեն հատուկ հանրակրթական ուսումնական հաստատությունների հիմնանորոգման աշխատանքներ:
• Կփոխվեն կրթության առանձնահատուկ պայմանների կարիք ունեցող երեխաների կրթության համար հատկացվող ֆինանսավորման չափաքանակները և կմշակվեն մեխանիզմներ կարիքների ամրագրման համար:
• Համաշխարհային առողջապահական կազմակերպության Ֆունկցիաների միջազգային դասակարգման հիման վրա կմշակվեն կրթության առանձնահատուկ պայմանների կարիքի գնահատման չափորոշիչներ:
• Հաստատությունների մասնագետների վերապատրաստում:
• Հատուկ ուսումնական հաստատությունների կառավարման տեղեկատվական համակարգի ներդրում: