Հայաստանը մասնակցել է ՅՈՒՆԵՍԿՕ-ի կազմակերպած նիստերին

Ս. թ. հունիսի 19-22-ը Փարիզում՝ ՅՈՒՆԵՍԿՕ-ի կենտրոնակայանում, կա­յա­­ցել է թեմատիկ խորագրերով եռօրյա նիստ, որի աշխատանքներին Հայաստանի Հանրապետությունից մասնակցել է ՀՀ մշակույթի նախարարության աշխատակազմի մշակութային արժեքների պահպա­նու­­թյան գործակալության հայտարարագրման և վկայագրման բաժնի պետ Ա. Հով­հան­­նիսյանը:

Հունիսի 19-ին կայացած «Գողացված կամ անօրինականորեն ներմուծված մշակութային ար­ժեք­­ների մասին» 1995 թ. UNIDROIT կոնվենցիայի կիրառման արդյունավետության վերաբեր­յալ հատուկ կոմիտեի առաջին նիստին ելույթ են ունեցել անկախ փորձագետները, նշելով, որ գողացված կամ անօրինականորեն ներմուծված մշակութային արժեքները միջազգային ընդունված նորմերին համապատասխան ետ վերադարձնելու նպատակով անհրաժեշտ է ունենալ ուժեղ իրավական դաշտ և համապա­տասխան մարմինների վերահսկողական համակարգված աշխատանք:

Հունիսի 20-ին և 21-ին՝ «Մշակութային արժեքների ապ­օրի­նի ներմուծման, արտահանման և սեփականության իրավունքի փոխանցման արգելմանն ու կանխմանն ուղղված միջոցառումների մասին» 1970 թ. կոնվենցիայի անդամ պետու­թյուն­­­ների 2-րդ հանդիպմանն, արդրադարձ է կատարվել այն փաստին, որ Կոնվենցիայի ընդունումից անցել է շուրջ 40 տարի և անհրաժեշտություն կա այն վերանայելու, լրացնելու, վերափոխելու, որպեսզի աշխարհն առավել արդյունավետ կերպով պայքարի մշակութային արժեքների ապօրինի արտահանման, ներմուծման, ինչպես նաև ապօրինի առևտրի դեմ: Ելնե­լով վերոնշյալից, ընդունվել է որոշում' ստեղծել մոնիթորինգ իրա­կանացնող հատուկ կո­մի­տե:

Հունիսի 22-ին՝ «Ծագման երկիր մշակութային ժառան­գու­թյան վերադարձի կամ դրա անօրինական յուրացման դեպքում փոխհատուցման վերաբեր­­յալ» ՅՈՒՆԵՍԿՕ-ի միջկառավարական կոմիտեի 18-րդ նիստին ներկայացվել են զեկույցներ համապատասխան մարմինների գործուն աշխա­տան­քի արդյունքում ապօրինի արտահանված մշակութային արժեք­ների հայտնաբերման և ծագման երկրներ վերադարձնելու վերաբերյալ: