Մոր և մանկան առողջության պահպանման հարցերով զբաղվուղ շուրջ 45 ՀԿ միավորվել է

ՀՀ առողջապահության նախարար Դերենիկ Դումանյանն ընդունել է Վորլդ Վիժն Հայաստան կազմակերպության տնօրեն Գրահամ Սթրոնգին, փորձագիտական աջակցման խմբի ղեկավար Սուսաննա Բագրատունուն, Երեխայի առողջության քարոզարշավի ղեկավար Նաիրա Ղարախանյանին:

Գրահամ Սթրոնգը նախարարին ներկայացրել է կազմակերպության գործունեության մանրամասները և նշել, որ քսան տարվա ընթացքում ձեռքբերված առողջապահական և քարոզչական աշխատանքների փորձի հիման վրա իրականացվում է հնգամյա համաշխարհային առողջապահական արշավ' ուղղված մոր և մանկան առողջության բարելավմանը:

Այդ համատեքստում կազմակերպությունը համագործակցում է նաև ՀՀ առողջապահության նախարարության հետ: 2010թ. ստորագրված փոխըմբռնման հուշագրի համաձայն` համատեղ իրականացվել և շարունակվում են Հայաստանում մոր և մանկան առողջության պահպանմանն ուղղված առողջապահական մի շարք ծրագրեր:

Նախարար Դումանյանը կարևորել է կազմակերպության դերն ու օժանդակությունը հատկապես 0-7 տարեկան երեխաների անվճար հիվանդանոցային բուժօգնության պետական հավաստագրի ներդրման, ինչպես նաև նախարարության պաշտոնական կայքի արդիականացման աշխատանքներում:

Հյուրը հավելել է, որ Վորլդ Վիժնը նպատակային աշխատանքների իրականացման, առողջապահության ֆինանսավորման, հասանելիության, հանրային մոնիտորինգի մեխանիզմների մշակման հարցերի շուրջ համագործակցում է նաև տեղական հասարակական կազմակերպությունների, միջազգային կառույցների, նաև զանգվածային լրատվամիջոցների հետ' մոր և մանկան առողջության հիմնախնդիրների իրազեկման և լուսաբանման ուղղությամբ: Նա նշել է, որ մոր և մանկան առողջության պահպանման հարցերով զբաղվուղ շուրջ 45 հասարակական կազմակերպություն միավորվել է մեկ դաշինքի ներքո, որը աջակցում է ոլորտի խնդիրները վերհանելով և լուծման ուղիներ առաջարկելով:

Գրահամ Սթրոնգն առողջապահության նախարարին է փոխանցել առողջապահության ոլորտի ֆինանսավորման այլընտրանքային աղբյուրների ուսումնասիրության արդյունքները, որոնք կարող են հետագայում կիրառելի դառնալ նաև Հայաստանում:

Դերենիկ Դումանյանը կարևորել է այլընտրանքային ֆինանսավորման մեխանիզմների կիրառումը: Միաժամանակ, նախարարը կազմակերպության տնօրենին առաջարկել է ընդլայնել հանրային իրազեկման շրջանակները' ուշադրությունը հրավիրելով իմունականխարգելման հարցերին:

Նախարարը խոսել է նաև ծննդօգնության և երեխայի հավաստագրերով մարզերից Երևան հիվանդների հոսքի, մարզերում մանկաբուժական ծառայության հզորացման հարցերի կանոնակարգման վերաբերյալ:

Գրահամ Սթրոնգը պատրաստակամություն է հայտնել աջակցել առողջապահության համակարգին մոր և մանկան առողջության պահպանմանն ուղղված բոլոր նախաձեռնություններում: