Հայաստան-Շվեյցարիա. համագործակցության նոր կամուրջներ

Հուլիսի 20-ին ՀՀ ԱԻ նախարար Ա. Երիցյանն ընդունել է Շվեյցարիայի զարգացման և համագործակցության գործակալության տարածաշրջանային գրասենյակի տնօրենի տեղակալ, մարդասիրական ծրագրի ղեկավար Մաթիաս Վայնգարթին և Հայաստանյան գրասենյակի ազգային ծրագրի պատասխանատու Սերգեյ Հովհաննիսյանին:

Գործակալության հետ ձեռք բերված պայմանավորվածության համաձայն' մինչև 2014 թ. վերջը նախատեսվում է ՀՀ ԱԻ նախարարության կազմում ձևավորել միջազգային որոնողափրկարարական խորհրդատվական խմբի (INSARAG) պահանջներին համապատասխան մեկ միջին թիմ, որի փորձի հիման վրա կստեղծվի նաև 10 թիմ մարզերում:

Հանդիպման նպատակն էր քննարկել INSARAG-ի պահանջներին ՀՀ ԱԻՆ թիմի համապատասխանեցման գործընթացի խնդիրները:

ՀՀ ԱԻ նախարարության և Շվեյցարիայի Համադաշնության միջև համագործակցությունը հիմնվում է ՀՀ և Շվեյցարիայի Համադաշնության կառավարության միջև 2004 թ. ապրիլին Երևանում ստորագրված «Տեխնիկական, ֆինանսական և հումանիտար համագործակցության մասին» համաձայնագրի և 2008 թ. դեկտեմբերին Երևանում ստորագրված «Արտակարգ իրավիճակների ժամանակ համագործակցության մասին» համաձայնագրի դրույթների վրա:

Շվեյցարիայի զարգացման և համագործակցության գործակալության հետ համատեղ 2004-2010 թթ. իրականացվել է «Արձագանք» ծրագիրը, որի նպատակն էր հզորացնել արտակարգ իրավիճակներին արձագանքման մարզային կառույցները' փրկարարների ուսուցման և համապատասխան սարքավորումների տրամադրման միջոցով: Ծրագրի շրջանակներում 63 հրշեջ-փրկարարական ջոկատ, այդ թվում' նաև հատուկ նշանակության 3 ջոկատ, հագեցվել են սարքավորումներով: Ախուրյանի հրշեջ մասի տարածքում կառուցվել է հրշեջ-փրկարարական փորձահրապարակ: Արդյունքում' ՀՀ ԱԻՆ փրկարար ծառայությունն ունի ավելի քան 2200 ուսուցում ստացած հրշեջ-փրկարարներ և կամավորներ' պատրաստ արձագանքելու աղետներին:

2010 թ. հունիսի 18-ին Երևանում ՀՀ կառավարության և Շվեյցարիայի Համադաշնության կառավարության միջև ստորագրվել է «Տեխնիկական և ֆինանսական համագործակցության մասին Հայաստանում արտակարգ իրավիճակներին արձագանքելու համակարգին օժանդակության վերաբերյալ» համաձայնագիր և հաստատվել «Արձագանք. Բուժմիավորներ» ծրագիրը:

Շվեյցարական գործակալությունն աջակցում է նախարարությանը նաև նորակառույց Ճգնաժամային կառավարման կենտրոնը տեխնիկական և տեղեկատվական սարքավորումներով հագեցնելու, ինչպես նաև խորհրդատվություն տրամադրելու ուղղությամբ:

ԱԻ նախարարը հյուրերին ներկայացրեց նախարարության նոր քայլերն ու ձեքբերումները, աղետակայուն պետություն կառուցելու տեսլականի ճանապարհը հաղթահարելուն կոչված ծրագրերն ու գործուն միջոցառումները: Արմեն Երիցյանը նշեց, որ այդ ճանապարհին Շվեյցարիայի զարգացման ու համագործակցության գործակալությունը լավագույն գործընկերն է:

Մաթիաս Վայնգարթն ընդգծեց, որ ՀՀ ԱԻՆ-ն իրենց բոլոր ամփոփումներում ներկայացվում է որպես հուսալի ու ստեղծագործ գործընկեր, որը ստացած յուրաքանչյուր օգնություն ավելացնում ու զարգացնում է, և որը յուրաքանչյուր նոր հանդիպմանը հաճելիորեն զարմացնում է:

Կողմերը պայմանավորվեցին մինչև 2016 թվականը Հայաստանում զարգացնել INSARAG-ի բոլոր հինգ պահանջներին համապատասխան ազգային կարողություններ՝ որոնողական, փրկարարական, աղետների բժշկության, ճգնաժամերի կառավարման և նյութատեխնիկական: