Ասադը պարտված է. The Times

«Սիրիայի ավտորիտար նախագահը, որը շրջապատված է հասարակական կարծիքից անտեղյակ խորհրդականների գաղտնի շրջապատով և պնակալեզներով, թվում է, որ հաճախ ոչ ամբողջական տեղեկություններ է ստանում երկրում տեղի ունեցող քաղաքական իրադարձությունների վերաբերյալ։ Սակայն նրա վստահելի օգնականներից երեքի սպանությամբ՝ սկսած պաշտպանության նախարարից և քրոջ ամուսնուց, Սիրիայի նախագահ Բաշար Ասադը վերջապես պետք է հասկանա, որ պարտվել է, իսկ միջազգային հանրությունը պետք է պատրաստի իշխանությունից Ասադի անցնցում հեռացումը և պետք է այն հանձնի այնպիսի քաղաքական ուժի, որն ի վիճակի կլինի կանխել արյունահեղությունը»,-գրում է The Times պարբերականը։ 

«Ռուսաստանը և Չինաստանը երրորդ անգամ վետո դրեցին ՄԱԿ–ի Անվտանգության խորհրդի կողմից Բաշար Ասադի ռեժիմի նկատմամբ ճնշումներն ավելացնելու բանաձևի վրա։ ՄԱԿ–ի ԱԽ–ում Ասադի դաշնակիցների համառությունը անուղղակիորեն դառնում է Սիրիայի խաղաղ բնակչության անիմաստ մահվան պատճառ», – նշված է պարբերականում։ 

Ըստ Times–ի, ՆԱՏՕ–ն պետք է մուտք գործի Սիրիայի օդային տարածք։ Դա Ասադին կստիպի՝ դադարեցնել խաղաղ բնակչության նկատմամբ հրթիռակոծությունը։ Ինչպես նշված է հոդվածում, այժմ այդպիսի հրթիռակոծություններ իրականացվում են ինչպես սիրիական օդուժի, այնպես էլ ցամաքային ուժերի կողմից։ 

Արևմուտքը Սիրիայի ընդդիմադիր բոլոր ուժերին պետք է հավաքի «Սիրիայի բարեկամներ» խմբի հովանու ներքո, որն էլ ճիշտ պահին երկիրը արդյունավետ ղեկավարելու կարողություն ունեցող այլընտրանքային կառավարություն կառաջարկի։ Ներկա իրավիճակը այդ գործընթացն արագացնելու լուրջ փաստ է հանդիսանում, գրում է The Times–ը։