Մեծամասնությունը ճնշո՞ւմ է փոքրամասնությանը

Նախորդ շաբաթ Ազգային ժողովի տնտեսական հարցերի մշտական հանձնաժողովի հերթական նիստի ընթացքում «Լուսավոր Հայաստան» խմբակցությունը ներկայացել էր առաաջարկով: Նախագծում  նախատեսվում էր եկամտահարկի փոխհատուցմամբ հիփոթեքային վարկով բնակարան գնելու համար նախատեսված արտոնությունը տրամադրել նաև մարզերի բնակիչներին: Նիստի ընթացքում իմքայլական պատգամավորներն առաջարկեցին հետաձգել նախագծի քննարկումը և շարունակել այն երեք շաբաթ հետո: Նախագծի մասին ԼՈՒՐԵՐ.com-ը զրուցեց «Լուսավոր Հայաստան» խմբակցության պատգամավոր Արկադի Խաչատրյանի հետ:

-Այս պահին տնտեսկան հանձնաժողովը աշխատո՞ւմ է այդ նախագծի վրա: Էդմոն Մարուքյանը  նիստի ժամանակ ասաց, որ «Իմ քայլը» խմբակցույթունը փորձում է ուղղակի ժամանակ ձգել և մերժել նախագիծը, նման վտանգ հիմա կա՞:

-Այո՛, հանձնաժողովի նիստում որոշում կայացվեց հետաձգել, քանի որ քաղաքական մեծամասնության ներկայացուցիչները կարծիք հայտնեցին, որ նախագիծն այս վիճակում պատրաստ չէ ընդունման և ենթակա է վերմշակման, որպեսզի հստակեցումներ արվեն և ռիսկերը նվազեցվեն: Մենք համաձայնվեցինք՝ պայմանով, որ նրանք ակտիվորեն մասնակցեն: Մինչև այսօր գրավոր որևէ առաջարկություն չենք ստացել: Կարծում եմ՝ դեռ ժամանակ կա և հուսով ենք, որ ակտիվ համագործակցություն կլինի, կլինեն առարկայական առաջարկություններ և կաշխատենք, կվերամշակենք այդ նախագիծը, քանի որ կարծում ենք, որ հանրությունն ունի դրա կարիքը: Այսօրվա դրությումբ  անհավասար պայմաններ են ստեղծված, Երևանում բազմաբնակարան շենքեր են կառուցվում,  կա առաջնային շուկա և մարդը կարող է գնել այնտեղից և հետ ստանալ եկամտահարկը: Սակայն մարզերում ցածր գների պատճառով բնակարանային շինարարություն չկա, հետևաբար, մարդիկ զրկված են առաջնային շուկայից բնակարան ձեռք բերելու հնարավորությունից և եկամտահարկը հետ ստանալուց: Ստացվում է, որ մարզաբնակ որևէ քաղաքացի ցանկանում է եկամտահարկը հետ ստանալով բարելավել իր բնակարանային պայմանները, նա պետք է բնակարան գնի Երևանում, ինչը աբսուրդ է: Մենք չենք ապահովում մարդականց բնակարանային պայմանների բարելավման հավասար իրավունքի իրացումը, այդ թվում մարզերում, իսկ դա սահմանադրական իրավունք է և այդ արտոնությունից պետք է օգտվեն նաև մարզերի բնակիչները:

-Այս ամսվա ընթացքում սա երկրորդ դեպքն է, երբ իշխանական կուսակցությունը մերժում է ընդդիմությանը: Խմբակցությունը մերժեց նաև արտահերթ նիստ անցկացնելու՝ Ձեր առաջարկը: Այդ օրը  Էդմոն Մարուքյանը հայտարարեց, որ մեծամասնությունը կրկին ճնշում է փոքրամասնությանը: Նման խնդիր կա՞:

-Իհարկե, ցանկալի կլիներ, որ քաղաքական մեծամասնության վերաբերմունքը ընդդիմության՝ նման նախաձեռնությունների հանդեպ ավելի բարենպաստ լիներ: Արտահերթ նիստի հետ կապված, հասկանում ենք, հիմնավորումն այն էր, որ այդ օրը նախատեսված էին այլ լսումներ՝ կապված  անցումային արդարադատության հետ: Մեր բարձրացրած խնդիրն ավելի կոնկրետ էր, վերաբերում էր դատաիրավական  բարեփոխումներին, և մենք նախաձեռնում էինք արտահերթ նիստ և ոչ թե լսումներ: Ցավոք սրտի, մեր ցանկացած արձագանքը չստացանք քաղաքական մեծամասնության կողմից:

-Խոսվում էր, որ նիստը կարող է կայանալ ավելի ուշ: Արտահերթ նիստ գումարելու որոշում կա՞:

-Դեռևս նման որոշում չկա, եթե լինի, տեղեկություն կտրվի:

 Ասպրամ Փարսադանյան