Ինչ են ասում օրենքները համբույրի մասին

Շատ երկրներում ու քաղաքներում անգամ համբույրն է օրենքով կարգավորվում հիմար օրենքներով: Այովայում արգելված է անծանոթների հետ համբուրվելը: Կոլորադոյում արգելված է քնած կնոջը համբուրելը, եթե անգամ այդ կինն ընկերուհի է, կինը կամ նույնիսկ քնած դուստրը, որին հայրը կամենում է «պաչիկ» անել, նույնպես արգելված է: Քոնեքթիքութում ավելի արտառոց օրենքներ են. ամուսիններն իրենց կանանց իրավունք չունեն համբուրել կիրակի օրերին: Իսկ այլ կանանց հետ կիրակի օրերին համբուրվելու մասին օրենքը լռում է:

Կան երկրներ, որտեղ բարքերն ավելի խիստ են, իսկ հասարակական վայրերում համբուրվելու համար պատիժը՝ բավականաչափ լուրջ: Մալազիայում, օրինակ, հասարակական վայրերում համբուրվելու համար սահմանված է 75 դոլար տուգանք: Ինդոնեզիայում նույն զանցանքի համար սահմանված տուգանքն ավելի թանկ է նստում՝ ազատազրկում մինչև 10 տարի ժամկետով կամ 100 հազար դոլար: Սիրառատ Ֆրանսիան ներողամիտ է այդ հարցում, սակայն տուգանում է համբույրի համար, եթե «դեպքը» կատարվում է երկաթուղու վրա: Անվիճելի է, որ այդ վայրում ոչ միայն համբուրվել, այլև կանգնել խորհուրդ չի տրվում:

Իրանում հասարակական վայրում համբուրվելը պատժվում է ճիպոտահարությամբ, ընդ որում, խոսքը միայն շուրթերը համբուրելու մասին չէ: 2004-ին իրանցի կինոաստղ Հորահ Քոմանդիրշը, տարվա լավագույն ֆիլմ անվանակարգում մրցանակի արժանանալով, ուրախությունից ռեժիսորին թույլ տվեց համբուրել իր ճակատը: 50-ամյա դերասանուհուն դատապարտեցին 74 ճիպոտահարվածի: Հրապարակային ներողությունից հետո միայն դատավճիռը փոխարինեցին պայմանական պատժամիջոցով:

Նման խիստ կարգեր են նաև ԱՄԷ-ում: Աբու Դաբիում փողոցում համբուրվելու դեպքում 10 օր կալանքի են դատապարտում: Մի քանի տարի առաջ Դուբայում 2 զբոսաշրջիկ՝ Ուկրաինայի քաղաքացին ու Ուզբեկստանի քաղաքացուհին փողոցում համբուրվելու համար տուգանվեցին 1000-ական դոլարով: Ոստիկանական արձանագրության մեջ նշվում է, որ նրանք անօրինական գործողություն են կատարել, ինչը հասարակական բարոյական նորմի խախտում է:

2009-ին նույն քաղաքում ոստիկանները ձերբակալել են Բրիտանիայից ժամանած սիրահար զույգին, որոնք համբուրվում էին ու գարեջուր խմում նորաձև Jumeirah Beach Residence թաղամասի ռեստորաններից մեկում: Նրանք նույնպես տուգանվեցին 1000 դոլարով ու մեկամսյա ազատազրկմամբ։ Ոստիկանություն էր կանչվել հարևան սեղանի այցելուն, որը վրդովված էր կատարվածով, պատճառաբանելով, թե ականատես են դարձել նաև իր երեխաները: Զույգը դատավճիռը բողոքարկեց, սակայն դատարանը մերժեց հայցը:

Նույնիսկ Իտալիայում է խստացել օրենքը համբույրի նկատմամբ: Մի 65-ամյա պարոն փորձել էր համբուրել անչափահասի ձեռնոցով ձեռքը, ինչի համար դատապարտվել էր մեկ տարվա ազատազրկման: Գուցե տարեց տղամարդու արարքը ճիշտ չէր հասկացվել: Գործը լսելուց հետո ազատազրկումը փոխարինեցին 25 մլն լիր տուգանքով: Ընդ որում, դատավորները նշել էին, որ եթե հանկարծ տղամարդը փորձեր շուրթերով հպվեր անչափահասի շուրթերին, ապա այդ արարքը կգնահատվեր որպես բռնություն, իսկ համբույրն այտին, պարանոցին կամ էլ չծածկված ձեռքին՝ վիրավորանք: Իտալացի խիստ դատավորների կարծիքով, միայն ճակատին դրոշմված հայրական համբույրը չի արգելվում: