Վիտալի Բալասանյանը կշնորհավորի Բակո Սահակյանին

Հուլիսի 19-ին ԼՂՀ-ում տեղի ունեցած նախագահական ընտրությունների նախնական արդյունքներով, Բակո Սահակյանը ստացել է քվեների 66.70 տոկոսը (47,085 ձայն), Վիտալի Բալասանյանը՝ 32.50 տոկոսը, Արկադի Սողոմոնյանը՝ 0.84 տոկոսը: Վիտալի Բալասանյանը երեկ հանդես էր եկել հայտարարությամբ, որում նշել էր, որ ընտրություններն ազատ էին, բայց արդար չէին:

«Գործող նախագահը և նրա թիմը ի վիճակի չեղան ապահովել արդար ընտրություններ: Ընտրություններն ազատ էին, բայց ոչ արդար: Ամբողջ նախընտրական քարոզարշավի ժամանակ և ընտրությունների օրը ժողովրդի վրա եղել են ճնշումներ, վարչական ռեսուրսն ամբողջովին ուղղված է եղել գործող նախագահի ձայնահավաքին»,- ասված էր հայտարարության մեջ:

Լուրեր.com-ը զրուցեց Վիտալի Բալասանյանի հետ, ճշտելու համար, շնորհավորելո՞ւ է Բակո Սահակյանին, թե՝ ոչ:

«Կենտրոնական ընտրական հանձնաժողովը դեռ պետք է հայտարարի հաղթողին, որից հետո նոր կսկսեն շնորհավորանքները: Ես էլ կշնորհավորեմ»,- ասաց Բալասանյանը:

Անդրադառնալով հարցին, թե կլինե՞ն առաջիկայում բողոքարկումներ, թե՝ ոչ, Բալասանյանն ասաց, որ կլինեն, բայց դեռ մանրամասներ հայտնել  չցանկացավ: