ՄԱԿ-ի գլխավոր քարտուղարը մտադիր է վերջ տալ Սիրիայում չդադարող սպանություններին

ՄԱԿ-ի գլխավոր քարտուղար Պան Կի Մունը հայտարարել է, որ հատուկ ներկայացուցիչ Քոֆի Անանի հետ համատեղ ձգտելու է վերջ տալ Սիրիայում բռնությանը, գրում է Лига-ն։

«Մենք չենք կարող հրաժարվել սիրիայի ժողովրդին իր օրինական ձգտումներին համապատասխան խաղաղ, ժողովրդավարական բարեփոխումներով ապահովելու մեր հավաքական պատասխանատվությունից»,- ասել է Պան Կի Մունը, որի խոսքերը մեջբերում է կազմակերպության մամուլի ծառայությունը։

ՄԱԿ-ի գլխավոր քարտուղարը կրկին կոչ է անում բոլոր կողմերին և, հատկապես, Սիրիայի կառավարությանն ու ընդդիմադիր ուժերին դադարեցնել սպանությունները և ծանր զինտեխնիկայի կիրառումը խաղաղ բնակչության դեմ։

Հիշեցնենք, որ ավելի վաղ ՄԱԿ-ի Անվտանգության Խորհուրդը երկարաձգել էր ՄԱԿ-ի դիտորդական առաքելության մանդատը 30 օրով։

Հիշեցնենք, որ Սիրիայում, ըստ իրավապաշտպանների, ուրբաթ օրը մահացել է առնվազն 128 մարդ: Նրանց մեծ մասը տուժել է Դամասկոսի՝ ընդդիմադիրների կողմից զբաղեցրած թաղամասերի վրա կառավարական զորքերի հարձակման հետևանքով։