«Պարենք հայերեն»-ը շարունակում է սովորեցնել

Այս ամառ մի խումբ երիտասարդներ, ում համար ազգային պարը բարձրագույն արժեք է, որոշեցին համախմբվել և ավելի շատ մարդկանց հասցնել մեր պարերի ոգին ու վեհությունը։ Այդ մտադրությամբ ստեղծվեց «Պարենք հայերեն» երիտասարդական նախաձեռնությունը։

Ազգային պարի բաց դասեր կազմակերպելու պրակտիկա մայրաքաղաքում արդեն կար։ Արդեն մի քանի տարի է՝ ամեն ամսվա վերջին ուրբաթ օրը նման միջոցառումներ է անցկացնում «Կարին» ազգագրական երգի և պարի խումբը։ Սկզբնական շրջանում «Պարենք հայերեն»-ին իրենց փորձով օգնում էին նաև «Կարինի» պարողները։ Ի դեպ, «Պարենք հայերեն»-ի պարողները «Կարինի» սիրողական խմբից են։

Երիտասարդները պարի բաց դասեր անցկացրին ամբողջ ամառվա ընթացքում և աշնան սկզբին՝ քանի դեռ եղանակը թույլ էր տալիս դրսում պարել։ Նրանք հայերեն պարել սովորեցրին Մալաթիա-Սեբաստիա վարչական շրջանի, Տավուշի մարզի Կողբ գյուղի, Արցախի Քարվաճառի շրջանի, Արմավիրի մարզի Արաքս գյուղի բնակիչներին, Հանքավանի ճամբարներից մեկի երեխաներին, ինչպես նաև մասնակցեցին հասարակական հնչեղություն ունեցող երկու իրադարձության՝ Վիշապների այգու փրկության տոնակատարությանը և Թռչկանի ջրվեժի պաշտպանության ակցիային։

Նախաձեռնությունը չի պատրաստվում կանգ առնել. այժմ երիտասարդները շաբաթ օրերին պարում են 181 դպրոցում։ Դպրոցականներն ու ուսուցիչներն էլ են ոգևորված. նրանք սիրով ու հետաքրքրությամբ բացահայտում են իրենց համար դեռևս անհայտ այն աշխարհը, որ կոչվում է ազգային պար։

«Պարենք հայերենը» պատրաստվում է համապատասխան պայմանավորվածությունների դեպքում ազգային պարի ոգին փոխանցել նաև այլ դպրոցների աշակերտներին։