Արաբական երկրները կոչ են արել Բաշար ալ-Ասադին թողնել նախագահի պաշտոնը

Արաբական երկրների լիգան կոչ է արել Սիրիայի նախագահ Բաշար ալ-Ասադին թողնել իր պաշտոնը «հանուն երկրի փրկության». Նման հայտարարություն է արվել կիրակի օրը Արաբական լիգայի անդամ երկրների արտաքին գործերի նախարարաների՝ Դոհա քաղաքում տեղի ունեցած հանդիպման արդյունքում։

«Ընդունելով հրաժարական տալու համարձակ որոշումը՝ Բաշար ալ-Ասադը կկարողանա կանգնեցնել ավերածություններն ու սպանությունները»,- ասել է Կատարի արտաքին գործերի նախարար շեյխ Համադ մեն Ջեսեմ ալ Թանին՝ ամփոփելով հանդիպման արդյունքները: Այս դիրքորոշմանն աջակցել են Արաբական լիգայի անդամ բոլոր երկրները, բացի մեկից։ Թե որ երկիրն է ձեռնպահ մնացել Ասադի հրաժարականի մասին կոչից, չի ասվում։

Բացի այդ, Արաբական լիգայի անդամ երկրների արտաքին գործերի նախարարների հանդիպման ժամանակ որոշում էր ընդունվել կոչ անել սիրիական ընդդիմությանը և, այսպես կոչված, Սիրիական ազատ բանակին ստեղծել ազգային միասնության անցումային կառավարություն։ Հանդիպմանը որոշվել է նաև 100 մլն դոլարի չափով օգնություն հատկացնել Սիրիայի փախստականներին։