Ասադի զորքերը վերադարձրել են վերահսկողությունը Դամասկոսի երկու թաղամասերի վրա

Սիրիայի կառավարական զորքերը Դամասկոսում վերադարձել են վերահսկողությունը ընդդիմության կողմից գրավված երկու թաղամասերի վրա, հաղորդում է Reuters-ը: Սիրիայի նախագահ Բաշար ալ-Ասադին հավատարիմ ուժերը դուրս են մղել ընդդիմադիր զորամիավորումներին դիվանագիտական Մեզզեհ և հյուսիսային Բարզեհ թաղամասերից, որոնց վերահսկողության վերադարձման օպերացիային մասնակցել է ավելի քան հազար զինծառայող և ապստամբ։ Նրանք ակտիվորեն օգտագործում էին ծանր ռազմական տեխնիկա: Ընդդիմության տվյալներով, Մեզզեհ թաղամասի վրա հարձակման ընթացքում կառավարական զորքերը մահապատժի են ենթարկել 20-ից 30 տարեկան հասակի առնվազն 20 տղամարդու։

Թաղամասերում վերահսկողության վերականգնման օպերացիան ղեկավարում էր Ասադի եղբայր Մահեր Ասադը։ Պետական ԶԼՄ-ները հերքում են մայրաքաղաքում տեղի ունեցած օպերացիայի ընթացքում ընդդիմադիրների դեմ ուղղաթիռների օգտագործումը։ «Մայրաքաղաքում իրավիճակը նորմալ է, սակայն անվտանգության ուժերը շարունակում են հետապնդել ահաբեկչական խմբերին քաղաքի որոշ թաղամասերում»,- ասվում է պաշտոնական ԶԼՄ-ների հաղորդագրություններում։

Նշենք, որ Սիրիական իրավապաշտպանները հաղորդում են, որ մեկ շաբաթվա ընթացքում՝ 2012 թ. հուլիսի 16-23-ը, Սիրիայում զոհվել է ավելի քան 1200 մարդ, որոնցից մոտ 300-ը սիրիական բանակի զինծառայողներ են:

Հիշեցնենք, որ Սիրիայում 2011 թ. մարտ ամսից շարունակվում են իշխանությունների և ընդդիմության հակամարտությունը: Ընդդիմությունը պահանջում է նախագահ Բաշար ալ-Ասադի հրաժարականը՝ մեղադրելով կառավարական ուժերին խաղաղ բնակչության դեմ զանգվածային վայրագությունների մեջ։ Պաշտոնական Դամասկոսը պնդում է, որ ժողովրդավարական կարգախոսների ներքո երկրում գործում են զինված ահաբեկչական խմբավորումներ, որոնց աջակցում են օտարերկրյա արմատական իսլամական խմբավորումները։ Զինված հակամարտության զոհ է դարձել ավելի քան 17 հազար մարդ: