Մանկական Եվրատեսիլ. սպասվում է կախարդական երեկո

  Մանկական Եվրատեսիլի` Երևանում կայանալիք մասնակից երկրների պատվիրակությունների ղեկավարների մասնակցությամբ այսօր «Անի Պլազա» հյուրանոցի  «Անի» սրահում գումարվել է ժողով: Այդ մասին լրագրողների հետ հանդիպմանը նշեց  Գոհար Գասպարյանը: Նրա խոսքերով բոլոր պատվիրակությունների ղեկավարների հետ եկան այն եզրակացության, որ ամեն ինչ պետք է անեն այնպես, որ այդ օրը վերածվի իսկական կախարդական երեկոյի: Ըստ Գոհար Գասպարյանի լինելու է երկու օր՝ դեկտեմբերի երկուսին և երեքին, ինչը պատահական չէ, քանի որ  մրցույթին ներկա գտնվելու ցանկություն ունեն շատերը: Դեկտեմբերի երկուսի համերգը լինելու է նույնությամբ ամսի երեքի համերգը, պարզապես առանց վերջնական արդյունքների:

Քվեարկության կարգի վերաբերյալ առանցքային փոփոխություններ չեն լինելու՝ գործելու է հիսուն-հիսուն սկզբունքը, բացառությամբ այն, որ քվեարկությունը սկսվելու է միայն համերգային ծրագրից հետո:

Հիշեցնենք, որ Հայաստանը մանկական Եվրատեսիլին մասնակցում է 2007 թվականից: Այս տարի այն Հայաստանում անցկացնելու բախտին արժանացրեց 12-ամյա Վլադիմիր Արզումանյանն  իր «Մայրիկ» երգով՝ նախորդ տարվա մանկական Եվրատեսիլ մրցույթին գրավելով առաջին տեղը: