Ձեռնպահ կմնանք Թուրքիայում հանգստանալուց. հայ քաղաքական գործիչներ

Lurer.com-ն օրերս հետաքրքվել էր քաղաքական գործիչներից, թե արդյոք ով որտեղ է պատրաստվում հանգստանալ։ Lurer.com-ը փորձել է իմանալ նաև, թե արդյոք ինչպես են վերաբերում վերջիններս հայ քաղաքական գործիչների՝ Թուրքիայի ծովափերում հանգստանալուն։ 

ՀՀԿ խոսնակ և ԱԺ փոխնախագահ Էդուարդ Շարմազանովը արձագանքել է այսպես.

«Ամեն մարդ ինքն է որոշում՝ որտեղ հանգստանալ, ես ինքս չեմ հանգստանում Թուրքիայի ծովափերում։ Միևնույն ժամանակ կոռեկտ չեմ համարում գնահատականներ տալ իմ կոլեգաների հանգիստի վայրն ընտրելու վերաբերյալ։ Իսկ ինչ վերաբերում է ինձ, ապա ինձ ավելի հոգեհարազատ է Հունաստանը»։

«Ժառանգություն» կուսակցությունից Ստյոպա Սաֆարյանն էլ, ինչպես ինքը նշեց, չափազանց լիբերալ է այդ հարցում։

«Ճիշտն ասած, մարդկանց չեմ կարող արգելել հանգստանալ Թուրքիայում, սակայն բոլորս պետք է հասկանանք, որ դրանով մենք լցնում ենք ոչ բարեդրացիական, ոչ բարեկամական երկրի բյուջեն։ Իսկ ինչ վերաբերում է ինձ, ես նույնիսկ իմ հարազատներին խորհուրդ չեմ տա գնալ մի երկիր, ուր Հայաստանը չունի դիվանագիտական ներկայացուցչություն և չունի ոչ մի հարաբերություններ այդ երկրի հետ»,- նշել է Ստյոպա Սաֆարյանը՝ ավելացնելով, որ Արևմտյան Հայաստան արժե գնալ, որովհետև խոսքը մեր հայրենիքի մասին է։

Դաշնակցական Վահան Հովհաննիսյանն էլ կտրականապես մերժում է Թուրքիայի ծովափերում հանգիստը։

«Խիստ բացասական են գնահատում, քանի որ դա արժանապատվության և քաղաքական գիտակցության պակասի դրսևորում է՝ չնայած իհարկե դա իրենց անձնական գործն է, բայց և այնպես սխալ է, քանի որ պետական գործիչները պետք է գիտակցեն, որ հանգստանալը մի երկրում, որը անընդհատ փորձում է ապտակել իր նախապայմաններով, վերաբերմունքով ու շրջափակումով, առնվազն քաղաքական գիտակցության բացակայության մասին է խոսում, իսկ իշխանության մեջ իրենց վերադասերը պետք է համարժեք հետևություններ անեն»,-եզրափակել է Վահան Հովհաննիսյանը։

ՕԵԿ խմբակցության ղեկավար Հեղինե Բիշարյանն էլ նշել է, որ քաղաքակական գործչի նման քայլը նպատակահարմար չի համարում։

«Ինձ համար այդքան էլ ընդունելի չէ», ասել է նա։

ԲՀԿ խմբակցության քարտուղար Նաիրա Զահրաբյանն էլ նշել է, որ չի դատապարտում ոչ ոքի ու չունի դրա իրավունքը։

«Դա ցանկացած մարդու որոշումն է, ուրեմն մարդիկ արդեն իսկ հաշվել են, որ Թուրքիայի ծովափերում 10 անգամ ավելի մարդավայել հանգիստ կարող են անցկացնել, քան սեփական հայրենիքում, դրա մասին թող մտածեն այն մարդիկ, ովքեր իրենց անմակարդակ հանգստյան տներում այնպիսի գներ են սահմանում, որ ցանկացած եվրոպացի ապշահար է լինում՝ գալով Հայաստան։ Միևնույն ժամանակ ինքս բազմաթիվ պատճառներով ձեռնպահ կմնամ մեկնելուց՝ բացարձակապես չդատապարտելով Թուրքիայում հանսգացողներին»,- ասել է ԲՀԿ-ական պատգամավորը։

Անկախ հնչեցրած բոլոր տեսակետների՝ այսպես թե այնպես քաղաքակական գործիչները հաստատել են մի բան, որ իրենք անձամբ ձեռնպահ կմանան Թուրքիայի ծովափերում հանսգտանալուց։ 

Լիլիթ Լալայան