Իսրայելը կոչ է անում ԵՄ-ին «Հեզբոլլահը» ներառել ահաբեկչական կազմակերպությունների ցանկում

Իսրայելի արտգործնախարար Ավիգդոր Լիբերմանը երկուշաբթի օրը կփորձի համոզել ԵՄ-ի իր գործընկերներին ներառել շիական «Հեզբոլլահ» շարժումն ահաբեկչական կազմակերպությունների ցանկում։ Այս որոշումը Լիբերմանը ընդունել է Բուրգասում տեղի ունեցած ահաբեկչությունից հետո։

«Նախարարը Լիբերմանը մեկնում է Բրյուսել, որտեղ նա կխնդրի Եվրամիության երկրներին ընդգրկել «Հեզբոլլահը» ահաբեկչական կազմակերպությունների ցուցակում և ամրապնդել անվտանգությանն ուղղված միջոցառումները օդանավակայաններում, ինչպես նաև իսրայելական և հրեական հաստատությունների մոտակայքում», - հայտարարել է Իսրայելի արտգործնախարարը։

Ինչպես հաղորդվում էր, Իսրայելը մեղադրել է Լիբանանում գործող արմատական շիա շարժմանը՝ «Հեզբոլլահին», և Իրանին Բուլղարիայի Բուրգաս քաղաքում տեղի ունեցած ահաբեկչության մեջ, որը խլեց 7 մարդու կյանք, այդ թվում նաև՝ Իսրայելի 5 քաղաքացու:

Հիշեցնենք, որ իսրայելական լրատվամիջոցներն իրենց հերթին հաղորդում են, որ իսրայելցի զբոսաշրջիկներով լի ավտոբուսի պայթեցման համար պատասխանատվությունը իր վրա է վերցրել մինչ այդ անհայտ «Քեդաթ ալ-Ջիհադ» խմբավորումը։ Բուլղարիայի արտաքին գործերի նախարարությունը հերքել է «Քեդաթ ալ-Ջիհադ» խմբավորման հայտարարությունը, սակայն ահաբեկչության հնարավոր հեղինակների մասին սեփական վարկած չի ներկայացրել։