Հնարավոր կլինի՞ խուսափել ադրբեջանա-արցախյան նոր պատերազմից. բուլղարացի քաղաքագետ

«Դժվար թե հնարավոր լինի խուսափել երկրորդ արցախյան պատերազմից»,- նման կարծիք է հայտնել բուլղար քաղաքագետ Գեորգի Իվանով-Կոլարովը «Ռեգնում» գործակալությանը տված հարցազրույցի ժամանակ:

«Արցախում նախագահական ընտրությունները լուրջ քայլ դարձան պետականության կառուցման գործընթացում և Արցախի Հանրապետության անկախության հարցում: Ընտրությունների ընթացքը և արդյունքները ցույց տվեցին, որ դրանք իրականում ժողովրդավարական են»,- «Ռեգնում» լրատվական գործակալությանը տված հարցազրույցի ժամանակ ասել է բուլղարացի քաղաքագետ Գեորգի Իվանով-Կոլարովը, ով միջազգային դիտորդի կարգավիճակով ներկա էր Արցախի նախագահական ընտրություններին։

«Ես առանձնազրույցներ եմ ունեցել երկու հիմնական թեկնածուների՝ Բակո Սահակյանի և Վիտալի Բալասանյանի հետ: Նրանք գործնականում լուրջ տարաձայնություններ չունեն հանրապետության զարգացմանն ուղղված հարցերում, ինչպես նաև նրանում, որ պետք է պատրաստ լինել անկախության պահպանմանը և թշնամուն համարժեք հակահարված տալուն: Նրանք համակարծիք են նաև այն հարցում, որ երկիրը պետք է հարաբերություններ պահպանի ամբողջ քաղաքակիրթ աշխարհի հետ, հասնի միջազգային ճանաչման, և ես չեմ կասկածում, որ դա շատ շուտով կլինի»,- նշել է քաղաքագետը։

Միևնույն ժամանակ, քաղաքագետը կարծում է, որ դժվար կլինի խուսափել երկրորդ ադրբեջանա-արցախյան պատերազմից:

«Ադրբեջանում այնքան շատ զենք և ռազմամթերք է կուտակվել, որ ալիևյան ռեժիմը դրանք կսկսի որևէ կերպ օգտագործել որպես «սոցիալական ելք»՝ հանրության ուշադրությունն իրենց հանցագործություններից, կոռուպցիայից և անօրինական հարստացումից շեղելու համար»,- ասել է նա՝ նշելով, որ Արցախի պաշտպանության ամրապնդումն անհրաժեշտ է, որպեսզի «թշնամուն համարժեք պատասխան տրվի»։

Իվանով-Կոլարովն ասել է նաև, որ արցախցիները ցանկանում են շփվել ողջ աշխարհի հետ, ինտեգրվել համաշխարհային հանրությանը։ «Հենց Արցախի տարածքն է մեր քրիստոնեական քաղաքակրթության սահմանը, ուստի աշխարհի բոլոր գիտակից մարդիկ, ում համար թանկ է ընդհանուր եվրոպական քաղաքակրթությունն այդ բառի լայն իմաստով, պետք է օգնեն Արցախին»,- իր խոսքն ամփոփել է բուլղարացի քաղաքագետը։