Ահարոն Ադիբեկյանն անգլիական միսիոներից ավելի վտանգավոր է. Հայկ Խանումյան

ԼՂՀ նախագահի թեկնածու Վիտալի Բալասանյանի շտաբի ներկայացուցիչ Հայկ Խանումյանը այսօր լրագրողների հետ խոսել է ԼՂՀ անցած ընտրությունների մասին։

«Աշխատել եմ Վիտալի Բալասանյանի հետ և հանդիսացել հասարակայնության հետ կապի պատասխանատու։ Ակներև է մասնավորապես հայաստանյան լրատվամիջոցների կողմից քարոզարշավի ակտիվ լուսաբանումը։ Վիտալի Բալասանյանը շնորհակալ է Հայաստանի հասարակությանը, քանի որ համակրանքը մեծամասամբ իր օգտին էր։ Իսկ, ահա, Բակո Սահակյանին աջակցել է էն Հիտլերի նմանը, որ կա՝ Խաչիկ Ասրյանը և Մենուա Հարությունյանը»,- ասել է Հայկ Խանումյանը՝ նշելով նաև ևս մեկ անձի անունը, ով, ըստ նրա, ողջ ընթացքում զբաղվել է ապատեղեկատվությամբ։

«Վիտալի Բալասանյանի մասին զրպարտություն տարածել է բոլորի կողմից հայտնի սոցիոլոգ Ահարոն Ադիբեկյանը, ով վարձված էր «Ազատ Հայրենիք» կուսակցության պատվերով։ Ընդ որում՝ վերջինս կուսակցության անունը սխալ էր հիշում՝ անվանելով այն «Ազատ Արցախ» կուսակցություն։ Ահարոն Ադիբեկյանը ասուլիսների ժամանակ տարածել է կեղծ տեղեկություն և փորձ արել ապակողմորոշել հասարկությանը»,- հայտարարել է Վիտալի Բալասանյանի կողմնակիցը։

Նրա խոսքով, Արցախում սոցիոլոգի կատարած բոլոր հարցումները տապալվել են, քանի որ սոցհարցումների ընդունելի սխալի փոքր տոկոսի փոխարեն Ահարոն Ադիբեկյանի կատարած հարցումների սխալի տոկոսը մի քանի հարյուր անգամ գերազանցում է ընդունելի նորման։

«Որպես օրինակ, 2007 թվականի ընտրությունների ժամանակ այս անձը Մասիս Մայիլյանի համար կանխատեսել էր 5%, իսկ արդյունքում վերջինս ստացավ 12%, ինչը 250%-ի տարբերություն է։ Իսկ այս նախագահական ընտրություններին սոցիոլոգ Ադիբեկյանը Վիտալի Բալասանյանի համար կանխատեսլ էր 3.5 տոկոս՝ վերջում հասցնելով 20%-ի, ինչի արդյունքում կրկին սխալվեց, քանի որ Վիտալի Բալասանյանը ստացավ ձայների 33%-ը։ Կարելի է եզրակացնել, որ կամ անձը պրոֆիսիոնալ չէ կամ էլ վարձու սոցիոլոգ է»։

Հայկ Խանումյանը, հղում անելով Վիտալի Բալասանյանի այն խոսքին, թե Ահարոն Ադիբեկյանը նույնացվում է 1912-ից 1920թթ Արցախում հայտնված անգլիական միսիոների հետ, ասել է, որ վերջինս ավելի վտանգավոր է, քան անգլիական միսիոները։ Ըստ նրա, վերջինս բավականին հեղինակազրկված է ՀՀ-ում, բայց այնուհանդերձ նա լուրջ վտանգ է ներկայացնում։

«Շուտով վերջինս կատարելու է նոր սոցհարցում ազատագրված տարածքների հանձման վերաբերյալ և վստահ եմ, որ կբերի հարցվածների լուրջ տոկոս, ովքեր իբր թե կողմ են տարածքները հանձնելուն»,- եզրափակել է Հայկ Խանումյանը։