Արցախի ընտրություններում կաշառք չկա. Արմեն Գրիգորյան (տեսանյութ)

«Արցախի ընտրությունների ամենագլխավոր առնձնահատկությունն այն է, որ կաշառք չկա»: Այս մասին այսօր լրագրողների հետ հանդիպման ժամանակ ասաց «Ժողովրդավարություն հանուն զարգացման» հ/կ նախագահ Արմեն Գրիգորյանը, պատասխանելով Lurer.com-ի հարցին, թե ՀՀ-ն Արցախից ընտրությունների անցկացման առումով սովորելու բան ունի՞:

Արմեն Գրիգորյանի խոսքերով, Արցախում դա ուրիշ կերպ է կատարվում: «Հիմա, եթե փորձենք ասել, որ իշխանությունը չի փորձում մարդկանց իր կողմը գրավել, դա սխալ կլինի, բայց սա կատարվում է այլ կերպ: Օրինակ, օգտագործվում է իշխանական ողջ ռեսուրսը, բայց փողի կաշառք չկա. Արցախում ամենակարևոր գործոններից մեկը սա է։ Գիտենք, որ Հայաստանում կաշառքը լայնամասշտաբ է և բավական բացասական ազդեցություն է ունենում, իսկ Արցախում ուղղակի այն չկա: Այդ նպատակին հասնելու տարբեր միջոցներ կան, բայց անգամ այդ պայմաններում, քիչ ռեսուրսներով ընդդիմադիր թեկնածուն կարողանում է 32.5 տոկոս ձայն հավաքել: Եթե ընտրակաշառքն լիներ ուղղակի, համոզված եմ, որ ավելի դժվար կլիներ նման արդյունք ապահովել, բայց քանի որ դա չկա՝ ընդդիմադիր թեկնածուի համար ավելի մեծ ծավալի ազդեցություն ունենալու ու ավելի մեծ ոլորտում գործունեություն ծավալելու հնարավորություն է ստեղծվում»,- նշեց Գրիգորյանը:

Վերջինիս խոսքերով, Արցախը Հայաստանից սովորելու բան ունի:

«Հայաստանում երկար ժամանակ տարբեր ընդդիմություններ են ձևավորվել, հետո երկար ժամանակ է՝ կա այդ ընդդիմադիր զանգվածը: Արցախում այդ ընդդիմադիր զանգվածը կամ ընդդիմադիր զանգվածին տեր կանգնելու ուժերը երկար ժամանակ է՝ չկային:

Իհարկե, բավական բացթողումներ Հայաստանում ընդդիմությունն ունեցել է և, դրանք տեսնելով, Արցախի ընդդիմությունը հնարավորություն ունի չկրկնելու բոլոր սխալները»: