Ավելի քան 90 մարդ է զոհվել Իրաքում մի շարք ահաբեկչական հարձակումների հետևանքով

Ավելի քան 90 մարդ է զոհվել երկուշաբթի օրը Իրաքի տարբեր շրջաններում մի շարք ռմբակոծությունների ու հարձակումների արդյունքում, հաղորդում է Agence France Press-ը՝ վկայակոչելով տեղական իշխանություններին և բուժծառայություններին։ Ըստ Reuters-ի, վիրավորների թիվը գերազանցել է 140-ը։

Սա Իրաքում վերջին երկու տարվա ընթացքում մեկ օրվա ընթացքում գրանցված զոհերի և վիրավորների ամենամեծ թիվն է։

Գործակալությունների հաղորդմամբ, զինյալների հարձակումը տեղի է ունեցել երկուշաբթի օրը Իրաքի հյուսիս–արևելյան մասում գտնվող Ուդեյմ (Udaim) քաղաքի ռազմական բազայի վրա՝ սպանելով 13 զինծառայողի:

Երկրի մայրաքաղաքում զինյալները պայթուցիկ սարք են ակտիվացրել կառավարության շենքի հարևանությամբ, որում բնակիչներին տրվում էին անձը հաստատող քարտեր։

Հաղորդվում է նաև, որ ևս մի քանի պայթյուն է տեղի ունեցել Թաջի քաղաքում (Taji) (Բաղդադից 20 կմ դեպի հյուսիս), որտեղ զինյալները պայթեցրել են մի քանի տուն, իսկ երբ հարձակումների վայր են ժամանել ոստիկանության աշխատակիցները և բժիշկները, մահապարտ ահաբեկիչը ակտիվացրել է ևս մեկ պայթուցիկ սարք։ Ըստ Reuters-ի, այս պայթյունների ընթացքում Բաղդադի ծայրամասում զոհվել է շուրջ 40 մարդ:

Երկրի հյուսիսում գտնով Քիրքուք քաղաքում պայթեցվել է առնվազն չորս ականապատ մեքենա։ Եվս մի քանի ահաբեկչական հարձակում, որոնք ուղղված էին անվտանգության ծառայության և ոստիկանության աշխատակիցների դեմ, տեղի են ունեցել Իրաքի արևելքում գտնով Դիալա գյուղում։