ՀՀ ԱԺ պատգամավորները դիտորդական առաքելությամբ գալիս են Արցախ, քեֆ անում և նվերներով բեռնված վերադառնում Հայաստան

Ինչպես հայտնի է, ԼՂՀ նախագահի ընտրությունների ժամանակ դիտորդական առաքելությամբ Արցախ էին մեկնել խորհրդարականան ուժերի ներկայացուցիչներ։ Դրա մասին խոսել է ԼՂՀ նախագահի թեկնածու Վիտալի Բալասանյանի նախընտրական շտաբի ներկայացուցիչ Հայկ Խանումյանը։

«Հայաստանի հանրությունը պետք է գործուղումների համար փող չտա խորհրդարանական այն պատգամավորներին, ովքեր գալիս են Արցախ դիտորդական առաքելությամբ, քանի որ վերջիներս, գալով Արցախ, քեֆ են անում ու վերադառնում Երևան»,- ասել է նա՝ հիմավորելով խոսքը նրանով, որ հայաստանյան պատգամավորներից ոչ ոք նախագահի թեկնածուների հետ չի հանդիպել։

Նրա տեղեկությամբ, խոսքը վերաբերում է և՛ իշխանություն ներկայացնող Էդուարդ Շարմազանովին, և՛ «Ժառանգություն» խմբակցության անդամ Խաչատուր Քոքոբելյանին, և՜ դաշնակցական Արմեն Ռուստամյանին, և՛ ՀԱԿ պատգամավոր Հրանտ Բագրատյանին, և՛ ՕԵԿ ներկայացուցիչ Մհեր Շահգելդյանին, ով, գոնե լինելով քաղաքագետ, պետք է հետաքրքություն ցուցաբերեր Արցախում քաղաքական գործընթացների նկատմամբ։

«Բացարձակ ոչ ոք չի հանդիպել մեզ հետ։ Հետևաբար, Հայաստանի հարկատուներ, այս մարդիկ ձեր փողերը մսխում են, գալիս են, քեֆ անում և, նվերներով բեռնված, վերադառնում Հայաստան։ Իրենց համար Արցախը սահմանափակվում է «Արմենիա» հյուրանոցի սալահատակով։ Միանշանակ է, որ չորրորդ գումարման ԱԺ-ում «Ժառանգություն» կուսակցության պատգամավորները միանշանակ մերժում էին ազատագրված տարածքների հանձնումը. ամենաարցախամետ կուսակցությունը «Ժառանգություն»-ն էր, իսկ այսօր այդպես չէ, լուրջ խնդիր ունենք, քանի ԱԺ-ում նման պատգամավորների թիվը նվազում է։ Տարածք հանձնող պատգամավորների թվի աճը ազգային անվտանգության խնդիր է։ ՀՀ ԱԺ-ի նման կազմն Արցախի համար լուրջ մտահոգության առիթ է տալիս»,- եզրափակել է նա։