Վերջին 5 տարվա ընթացքում բոլոր առաջարկություններն ընկալվել են որպես հանցագործություն. Հայկ Խանումյան

Լրագրողների հետ հանդիպման ժամանակ ԼՂՀ նախագահի թեկնածու Վիտալի Բալասանյանի նախընտրական շտաբի ներկայացուցիչ Հայկ Խանումյանը խոսել է Արցախում հետընտրական գործընթացների մասին։

«Քարոզարշավի ընթացքում սկսվել էր մի գործընթաց, որը սովորաբար տեղի է ունենում Արցախում. Արցախի մամուլում հայտնված ամեն մի քննադատական հոդվածի դեպքում հատուկ պատվիրակություններ էին ուղարկվում խմբագիրների հետ հանդիպումներ ունենալու, նրանց համոզելու համար։ Որպես օրինակ՝ Վիտալի Բալասանյանին ուղղված աջակցող նամակի հեղինակ-գիտնականներից իրենց դեկանները և գիտական հիմնարկների ղեկավարները պահանջել են պատասխան տալ»,- ասել է Հայկ Խանումյանը։

Նրա խոսքով, վերջին 5 տարիների ընդդիմադիր ուժ կամ մամուլ չէր եղել։ Իսկ դրանից առաջ ընդդիմադիր դիրքորոշում ուներ միայն ՀՅԴ արցախյան կառույցը։ Հասարակության մեջ այս տարիների ընթացքում կուտակվել էին բազմաթիվ խնդիրներ, որոնք չեն ստացել լուծումներ։ Իսկ խնդիրների բարձրացման դեպքում դրանք անմիջապես կացնահարվում են։ Ինչպես նշել է Հայկ Խանումյանը, Բակո Սահակյանն ու իր թիմը երբեք կոնտակտի մեջ չեն մտել ժողովրդի հետ, իսկ առաջարկություններն ընկալվել են որպես հանցագործություն։

«Նման գործելակերպի հետևանքով 2010 թվականից Freedom House-ի կողմից Արցախը ընդգրկվել է ոչ ազատ պետությունների ցանկում, ինչի մասին ես անձամբ զգուշացնում էի դրանից դեռ մեկ տարի առաջ։ Փաստորեն Բակո Սահակյանի բռնած ուղու շնորհիվ նախկինում մասամբ ազատ համարվող Արցախը հայտնվեց Ադրբեջանի կողքին՝ ոչ ազատ երկրների շարքում։ Իսկ միջազգային հանրութան կարծիքը ձևավորվում է հենց դրանով, իսկ, ահա, Հայաստանի նախագահն ու արտգործնախարարը մրցակցում են միմյանց հետ տարածքները հանձնելու հայտարարություններով»,- ասել է Հայկ Խանումյանը՝ միևնույն ժամանակ նշելով, որ ձայների 33%-ը հիմք է Վիտալի Բալասանյանի կողմից քաղաքական ուժ ստեղծելու համար, ձայներ, որոնք տրվել են միայն խիզախության շնորհիվ։

Հայկ Խանումյանն ասել է նաև, որ Վիտալի Բալասանյանը հանդես է եկել նոր քաղաքական ուժ ստեղծելու հայտարարությամբ, իսկ կուսակցության անունն ու մնացած հարցերը քննարկման ու մշակման փուլում են։