Ո՞վ է ում «քաշում»

Հայաստանը շարունակում է ունենալ տնտեսական բավականին բարձր ակտիվության ցուցանիշ, այսօր Կառավարության նիստի մեկնարկին հայտարարեց վարչապետ Նիկոլ Փաշինյանը։ Վարչապետն արձանագրեց՝ Հայաստանն արտահանման հետ կապված պրոբլեմները հաղթահարել է, և Հայաստանի տնտեսական համակարգը ընկալել և մարսել է տնտեսական հեղափոխության վերաբերյալ՝ կառավարության մեսիջները։

Անհասկանալի է, թե ինչը և ինչպես է մարսել տնտեսությունը, եթե անգամ վարչապետի կաբինետի անդամը՝ ֆինանսների նախարար Ատոմ Ջանջուղազյանը չի կիսում վարչապետի լավատեսությունը: Մասնավորապես՝ անցած շաբաթ՝ ԱԺ-ում, նախարարը հայտարարել էր, որ արտահանման անկումը մտահոգիչ է: Այսինքն, նախարարի համար մտահոգիչ է, վարչապետի համար՝ ոչ: Ինչևէ, սա առաջին հակասությունը չէ, որ առկա է երկու պաշտոնյաների հայտարարությունների միջև:

Ջանջուղազյանը հայտարարում էր, որ կապիտալ ներդրումների ծավալը ցանկալի մակարդակի չէ, իսկ վարչապետը հայտարարում է, որ ներդրումների հետ կապված որևէ խնդիր չկա, ամեն ինչ հոյակապ է: Նման իրավիճակն առնվազն տարակուսելի է և դժվար է տրամաբանորեն բացատրել վարչապետի և նախարարի միջև եղած հակասությունները: Գուցե նրանց տարբեր վիճակագրական տվյալնե՞ր են հրամցնում, թե՞ նրանցից մեկը խոսում է թվերով, իսկ մյուսը պարզապես քաղաքական դիվիդենտներ է հավաքում…