Գյուղատնտեսության նախարարն ընդունեց Իրանի նորանշանակ դեսպանին

Հուլիսի 23-ին ՀՀ գյուղատնտեսության նախարար Սերգո Կարապետյանն ընդունեց Հայաստանի Հանրապետությունում Իրանի Իսլամական Հանրապետության նորանշանակ արտակարգ և լիազոր դեսպան Մոհամմադ Ռեիսիին, վերջինիս խնդրանքով:

Շնորհավորելով դեսպանին՝ բարձր և պատասխանատու պաշտոնի նշանակվելու կապակցությամբ, նախարարը հույս հայտնեց, որ պարոն Ռեիսիի հետ համագործակցությունը նույնքան արդյունավետ կլինի, որքան նրա նախորդի հետ: Անդրադառնալով գյուղատնտեսության ոլորտում հայ-իրանական համագործակցության հարցերին' Սերգո Կարապետյանը կարևորեց երկողմանի կապերի հետագա ընդլայնումը , հատկապես' բուսաբուծության և անասնապահության ոլորտներում:

«Այստեղ չօգտագործված մեծ հնարավորություններ կան: Անցյալ տարի պաշտոնական այցով գտնվելով Իրանի Իսլամական Հանրապետությունում, ես ստորագրեցի երկկողմ համագործակցության մասին փոխըմբռման հուշագիր: Ցավոք, կարևոր այդ փաստաթղթի պահանջների կատարման ուղղությամբ իրականացված աշխատանքները դեռևս բավարար չեն: Ցանկանում եմ, որ պարոն դեսպանի օժանդակությամբ մենք կյանքի կոչենք ձեռքբերված պայմանավորվածությունները, որպես առաջին քայլ, Հայաստանում ստեղծելով՝ «Հալալ» մակնշմամբ սպանդանոցային համալիր»,- նշեց ՀՀ գյուղատնտեսության նախարարը:

Իր հերթին շնորհակալություն հայտնելով ջերմ ընդունելության և ներկայացված տեղեկատվության համար, դեսպանը պատրաստակամություն հայտնեց հետևողականորեն շարունակել նախկինում ձեռք բերված պայմանավորվածությունների իրականացումը և նպաստել երկկողմ համագործակցության հետագա խորացմանը: Նա փոխանցեց Իրանի Իսլամական Հանրապետության գյուղատնտեսության նախարար Սադեղ Խալիլիանիի ողջույնի խոսքը հայ գործընկերոջը և պատրաստակամությունը երկու երկրների ագրարային ոլորտում գործակցության նոր ծրագրերի իրականացման վերաբերյալ: 

Նախարար Սերգո Կարապետյանը հիշեցրեց, որ առաջիկայում Երևանում նախատեսվող առևտրատնտեսական հարցերով հայ-իրանական միջկառավարական հանձնաժողովի հերթական նիստի օրակարգում ընդգրկված են գյուղատնտեսությանը վերաբերող բազմաթիվ հարցեր և, դրանից ելնելով, հայկական կողմն առաջարկել է Հայաստան հրավիրել ԻԻՀ գյուղատնտեսության նախարարին: