Լևոն Մանասերյանը արժանացել է դափնեկրի և մրցանակակրի կոչման

Ս. թ. հունիսի 28-ից հուլիսի 1-ը Մյունխենի հայտնի «Steinway-Haus»–ի Արթուր Ռուբինշտեյնի անվան համերգային դահլիճում կայացել է «MÜNCHNER KLAVIERPODIUM DER JUGEND» դաշնակահարների 12-րդ միջազգային մրցույթը, որին Հայաստանից մասնակցել է Երևանի Կոմիտասի անվան պետական կոնսերվատորիայի դաշնամուրային ֆակուլտետի 3-րդ կուրսի ուսանող Լևոն Մանասերյանը (պրոֆեսոր Սերգեյ Սարաջյանի դասարան), արժանանալով մրցույթի դափնեկրի կոչման և երեք հատուկ մրցանակի' «Hoffnungs-Preis» München (Հույսի մրցանակ), «Bladowski-Preis» Baldham (դրամական խրախուսանք), «Juri-Grachew-Preis» New York (Յուրի Գրաչևի մրցանակ): Մրցույթն ամեն տարի նվիրվում է որևէ կոմպոզիտորի և մրցանակային տեղեր չի նախատեսում: Այս տարվա մրցույթը նվիրված էր կոմպոզիտոր Ս. Պրոկոֆևին, ծրագրում պարտադիր կատարման համար ներառված էր մեծանուն կոմպոզիտորի N1(op.1) կամ N 3(op.28) դաշնամուրային սոնատները: Ս. Պրոկոֆևի N 3(op.28) սոնատից բացի հայ դաշնակահարի կատարմամբ հնչել են' Ֆ. Շոպենի cis-Moll op.27/1 նոկտյուրնը, Ռ. Շումանի C-Dur op.18 «Արաբեսկը», Ֆ. Լիստի «Իսպանական ռապսոդիան» և Ս. Ռախմանինովի es-Moll op.39/5 Էտյուդ-պատկերը:

«MÜNCHNER KLAVIERPODIUM DER JUGEND» դաշնակահարների միջազգային մրցույթին այս տարի իրենց մասնակցությունն էին բերել շուրջ 90 դաշնակահար տարբեր երկրներից: 5-րդ խմբում, որում հանդես էր եկել Լևոն Մանասերյանը, մասնակցում էին 14 դաշնակահար' Գերմանիայից, Ավստրիայից, Ռուսաստանի Դաշնությունից, Չինաստանից, Չեխիայից, Սլովակիայից, Ուկրաինայից, Մալազիայից:

Հանձնաժողովի կազմում ընդգրկված էին անվանի երաժիշտներ Ռուսաստանից, Գերմանիայից, Ավստրիայից, Ճապոնիայից, ԱՄՆ-ից, Իսրայելից: Լևոն Մանասերյանը ժյուրիի կողմից հրավիրվել է մասնակցելու փառատոների և վարպետության դասերի: