«Ժողովուրդ». Մեր տեսակի մարդիկ իրար հետ պրոբլեմներ չեն ունենում. Ներսես Նազարյան

Երևանի ոստիկանապետ, ոստիկանության գեներալ-մայոր Ներսես Նազարյանի հնարավոր պաշտոնանկության թեման որքան անիրական է թվում, նույնքան էլ հավանական է: Արդեն խոսվում է, որ արձակուրդի մեկնած Նազարյանը հավանաբար այլևս չի վերադառնա, կմնա ոստիկանության կադրերի տրամադրության տակ:

«Ժողովուրդ»-ի լավատեղյակ աղբյուրները փոխանցում են, որ Նազարյանին պաշտոնանկ անելու հեռանկարը պայմանավորված է նաև Ռուբեն Հայրապետյանի այսօրվա ոչ ազդեցիկ կարգավիճակով:

Եթե նախկինում Հայրապետյանը մեկ հեռախոսազանգով Սերժ Սարգսյանին խնդրում էր Ներսես Նազարյանին թողնել իր պաշտոնում, ապա այսօր իրավիճակն այլ է: 

Ստորև ներկայացնում ենք Ներսես Նազարյանի հետ թերթի հարցազրույցից մի հատված.

-Պարոն Նազարյան, ըստ տեղեկությունների՝ Դուք արձակուրդից չեք վերադառնալու, քանի որ պաշտոնանկ եք արվելու:

-Կապրենք՝ կտեսնենք:

-Ձեզ պաշտոնանկ անելու հեռանկարը պայմանավորվում է Ռուբեն Հայրապետյանի ներկայիս խոցելի կարգավիճակով նաև նրանով, որ Հայրապետյանն այսօր չի կարող Ձեր «թիկունքին կանգնել»:

-Չէ, չէ, նման բան չկա, նման հարց չկա, դրանք իրականությանը չեն համապատասխանում:

Պատասխանելով «Ժողովուրդ»–ի այն հարցին, թե «ի՞նչ-որ խնդիրներ ունեք ոստիիկանապետ Վլադիմիր Գասպարյանի հետ», Նզարյանը պատասխանել է, որ «բացարձակ խնդիր չկա»:

-Իսկ արձակուրդ գնալուց առաջ Դուք և ոստիկանապետն.ինչպես եք իրարից «բաժանվել», վերջնական հաջողություն եք մաղթել միմյանց, թէ՞ վերադառնալու ակնկալիքով եք մեկնել հանգստի:

-Շատ լավ արդեն ես արձակուրդի մեջ եմ: Ոստիկանապետի հետ մենք շատ լավ ընկերներ ենք, 25 տարի է արդեն, և երբեք ոչ մի բան չի կարող մեր հարաբերությունների... Անկախ նրանից' մենք իրար հետ կաշխատենք, չենք աշխատի, մենք երկուսս էլ նորմալ մարդիկ ենք՝ մանկությունն իրար հետ ապրած, կյանքում մենք իրար հետ երբեք չենք կարող պրոբլեմ ունենալ: Մեր տեսակի մարդիկ իրար հետ պրոբլեմներ չեն ունենում: