«Հրապարակ». «Սիվիլիթասի» կայքում հիմնադրամի հոգաբարձուների խորհրդի կազմում կա հանգուցյալի անուն

Մի ուշագրավ փաստ. «Սիվիլիթասի» կայքում հիմնադրամի հոգաբարձուների խորհրդի պատվավոր անդամների կազմում թերթը նկատել է անձի անուն, ով վաղուց արդեն հանգուցյալ է: Խոսքը Ջիվան Թաբիբյանի մասին է:

Թերթը նշում է, որ հոգաբարձուների խորհրդի պատվավոր անդամների կազմում կան Կանադայի, Ֆրանսիայի, Իսրայելի, ԱՄՆ-ի, Ավստրիայի, Ռուսաստանի, Թուրքիայի քաղաքացիների, ՀՀ նախկին վարչապետ Արմեն Դարբինյանի, Սերժ Թանկյանի, Ատոմ Էգոյանի անունները:

ԹԵրթը հիշեցնում է նաև, որ Ջիվան Թաբիբյանը ԵԱՀԿ-ում Հայաստանի նախկին ներկայացուցիչն էր, ով մահացել է դեռ 2009-ին:

«Առաջին անգամ ցանկն աչքի անցկացնելուց բավականին զարմացանք և փորձեցինք գոնե այս մասին մեկնաբանություններ ստանալ, սակայն տիկինը անդրդվելի էր՝ անգամ տեղեկանալով, որ խոսքը հոգաբարձուների կազմի մասին է: Կամ էլ Ղազարյանը, կռահելով հարցը, հույսը դրել էր իրենց մտածած հնարամտության վրա: Բանն այն է, որ այստեղ զավեշտալի լուծում են գտել հանգուցյալին մատնանշելու համար, երկրորդ անգամ ընթերցելուց միայն այդ ցանկում նկատեցինք, որ Ջիվան Թաբիբյանի անուն-ազգանվան դիմաց փոքրիկ խաչ է դրված: Մինչդեռ պարզ է, որ հոգաբարձուների խորհուրդը ոչ թե պատվո տախտակ է, այլ կոնկրետ հարցեր քննարկող և հիմնադրամի գործունեության ուղղությունները որոշող գործուն մարմին»,- գրում է թերթը: