Էրդողան. «Իմ անունը երբեք չի կարելի կապել Հայկական հարցի հետ»

«Էրդողանն իր այս հայտարարությամբ հաստատեց, որ թուրքական արխիվներում կան փակ, գաղտնի փաստաթղթեր: Սա մեծ հարված էր իշխող կուսակցության հակառակորդ քեմալական կուսակցությանը»,- այսօր լրագրողների հետ հանդիպման ժամանակ ասաց թուրքագետ Ռուբեն Մելքոնյանը՝ անդրադառնալով վերջերս Թուրքիայի վարչապետ Ռեջեփ Թայիփ Էրդողանի՝ Դերսիմի քրդական ջարդերի մասին արած հայտարարությանը:

Թուրքագետը փաստեց նաև, որ «Էրդողանը ուզի թե չուզի՝ ներողություն է խնդրելու նաև հայերից: Որովհետև բացի քրդերից և զազաներից, այնտեղ ապրել են նաև 30.000 հայեր, որոնք բնակություն են հաստատել Դերսիմում՝ ցեղասպանությունից հետո»:

«Կան բազմաթիվ փաստաթղթեր, տարբեր պաշտոնյաների զեկուցագրեր, որտեղ նշվում է, որ թուրքերի հիմնական թիրախը Դերսիմում եղել են հայերը։ Էրդողանի կատարած հայտարարությունը դարձել է թուրքական ներքաղաքական հիմնական խնդիրներից մեկը, և հենց թուրքերն իրենք կապում են այն Հայոց ցեղասպանության հետ»,- ասաց թուրքագետ Ռուբեն Մելքոնյանը:

Նրա խոսքերով` «այս հայտարարության շուրջ բոլոր խոսակցությունների մեջ կարմիր թելի նման անցնում է, որ հաջորդ քայլը Հայոց ցեղասպանության ընդունումն է»:

Ըստ բանախոսի՝ Էրդողանի այս հայտարարության հետ կապված թուրքական հասարակության բացասական վերաբերմունքին ի պատասխան՝ Թուրքիայի վարչապետը հայտարարել է. «Իմ անունը երբեք չի կարելի կապել Հայկական հարցի հետ»։