ԱՄՆ-ը չի պատրաստվում ներխուժել Սիրիա. Սպիտակ Տուն

Երկուշաբթի օրը Սպիտակ Տան մամուլի խոսնակը Ջեյ Քարնին հայտարարել է, որ ԱՄՆ-ը չի պատրաստվում ռազմական ճանապարհով միջամտել Սիրիայի իրավիճակին կամ ներխուժել այս երկրի տարածք: «Նախագահ Բարաք Օբաման կարծում է, որ նման գործողությունները սխալ կլինեին»,- ասել է նա՝ մեկնաբանելով հանրապետական սենատոր Ջոն Մաքքեյնի հայտարարությունն առ այն, որ Վաշինգտոնը բավականին ջանք չի գործադրում ներսիրիական հակամարտության լուծման համար։

Միևնույն ժամանակ Ջեյ Քարնին նշել է, որ ԱՄՆ վարչակազմը մտադիր է հասնել Սիրիայի նախագահ Բաշար ալ-Ասադի պաշտոնանկությանը, բայց դա կանի պատժամիջոցների և հետագա միջազգային մեկուսացման ճանապարհով։ Սպիտակ Տան մամուլի խոսնակն ընդգծել է, որ Միացյալ Նահանգները կշարունակեն այդ աշխատանքը այլ երկրների հետ միասին և ռազմական աջակցություն կցուցաբերեն Սիրիայի ընդդիմությանը։

Պետդեպարտամենտի ներկայացուցիչ Վիկտորիա Նուլանդը հաղորդել է, որ ԱՄՆ-ը մտադիր է ավելի ակտիվ գործել, սակայն ոչ թե ՄԱԿ-ի Անվտանգության խորհրդի միջոցով, որտեղ Ռուսաստանը և Չինաստանը արգելափակել են Սիրիայի հարցով երեք բանաձևերը, այլ դիվանագիտական ուղիներով՝ նկատի ունենալով երկրներին, որոնք այս հարցում ունեն նույն հայացքները, ինչ և Միացյալ Նահանգները և առաջին հերթին՝ «Սիրիայի բարեկամների խմբի» մասնակիցներին, հաղորդում է ИТАР-ТАСС-ը: Վիքտորիա Նուլանդը պատմել է, որ Վաշինգտոնը մտադիր է համաձայնեցնել նրանց հետ իր ջանքերը, որոնք ուղղված են Ասադի ռեժիմի դեմ պատժամիջոցների խստացմանը, ընդդիմության աջակցմանը, որոնք գտնվում են ինչպես երկրի ներսում, այնպես էլ երկրի սահմաններից դուրս։ Ըստ նրա, նպատակներից մեկն է նախապատրաստել Սիրիայի ընդդիմությանն իշխանության սահուն փոխանցման և ժամանակավոր ղեկավարման՝ այնքան ժամանակ, մինչև Սիրիայում տեղի կունենան ժողովրդավարական ընտրություններ։

Պետդեպարտամենտի ներկայացուցիչն ասել է նաև, որ ԱՄՆ-ը ճիշտ է համարում սիրիական իշխանությունների՝ սեփական քաղաքացիների դեմ կատարած հանցագործությունների մասին տեղեկատվության հավաքագրումը, որոնց համար Դամասկոսի ներկայիս իշխանությունները պիտի պատասխանատվություն կրեն։ Նրա խոսքով, Սիրիայի պաշտոնատար անձանց վերաբերյալ նման «գործերը» արդեն կազմվում են։

Բացի այդ, ԱՄՆ-ը կարող է մարդասիրական օգնություն տրամադրել սիրիացիներին՝ զերծ մնալով ընդդիմությանը ռազմական բեռների մատակարարումից։ «Այլ երկրներ որոշել են գնալ այլ ճանապարհով, բայց թող նրանք խոսեն իրենց համար»,- ասաց ամերիկացի դիվանագետը: Միևնույն ժամանակ, նա անպատասխան է թողել լրագրողների հարցերը մի քանի արաբական երկրների, մասնավորապես, Կատարի և Սաուդյան Արաբիայի կողմից Սիրիայի ընդդիմադիրներին զինամթերքի մատակարարման մասին: