«Դուխով» արտաքին քաղաքականության միակ չափելի արդյունքը

Վերլուծական 6 Հուլիս, 2019 13:00

Հեղափոխության օրերին ընդդիմության առաջնորդ Նիկոլ Փաշինյանը բազմիցս քննադատել է Սերժ Սարգսյանի արտաքին քաղաքականությունը և հատկապես՝ Սարգսյանի պաշտոնական այցերը արտասահմանյան երկրներ, որոնք, ըստ Փաշինյանի, մեր երկրին որևէ գործնական օգուտ չեն բերում: Ասել է թե, Փաշինյանը Սարգսյանին մեղադրում էր թույլ արտաքին քաղաքականություն վարելու մեջ:

Վարչապետը հուլիսի 1-ի դրությամբ ընդամենը երեք պաշտոնական այց էր կատարել արտերկիր` Վրաստան, Իրան, Գերմանիա։ Այս օրերին Փաշինյանը պաշտոնական չորրորդ այցն է կատարում՝ Վիետնամ, այնուհետև մեկնելու է Սինգապուր՝ այցի ձևաչափը կրկին պաշտոնական է: Նախորդ երեք դեպքերում վարչապետը ձեռնունայն է վերադարձել այդ «ուղեւորություններից». որեւէ կոնկրետ պայմանավորածության, երկկողմ համագործակցության առարկայական ծրագրերի մասին խոսք չկա։ Մնացածը աշխատանքային այցեր են` բազմակողմ ֆորումների, հանդիպումների շրջանակներում, որոնք եղանակ չեն ստեղծում միջպետական հարաբերություններում։ Ասել է թե, Փաշինյանի արտաքին քաղաքականությունը շատ ավելի պասիվ է, օրակարգից զուրկ, քան նախորդ իշխանությունների վարած արտաքին քաղաքականությունը: Փաշինյանի՝ Չինաստան կատարած այցի շրջանակում , քննարկվել է Հայաստանի «Հյուսիս-Հարավ» ծրագիրը՝ որպես չինական «Մեկ գոտի մեկ ճանապարհ» նախագծի մի մաս դիտարկելու հարցը: Սակայն, գաղտնիք չէ, որ այդ հարցը օրակարգ է մտել դեռևս Սերժ Սարգսյանի՝ Չինաստան կատարած այցի ժամանակ և Հայաստանի նոր իշխանություններն այստեղ հեծանիվ չեն հորինել, կամ հայ-չինական հարաբերություններում նոր օրակարգ չեն ներմուծել՝ նախընտրելով շարժվել նախկինների թողած ժառանգության իներցիայով: Սինգապուր վարչապետի կատարվելիք այցին ընդառաջ հայտնի դարձավ, որ կառավարությունը հավանություն է տվել այդ երկրի հետ կրկնակի հարկումը բացառող համաձայնագրին: Ի դեպ, այդ համաձայնագիրը բանակցվել և վերջնական տեսքի է բերվել դեռևս նախկին վարչապետ Կարեն Կարապետյանի՝ Սինգապուր կատարած այցի շրջանակներում:

Ինչպես երևում է՝ չունենալով արտաքին քաղաքականության սեփական օրակարգը, ռազմավարությունը, ինչպես նաև չկարողանալով ՀՀ միջազգային գործընկերներին, շահագրգռիռ կողմերին ներկայացնել նոր և երկկողմ շահավետ առաջարկներ՝ Փաշինյանին պաշտոնական այցերի էֆֆեկտիվությունը պետք է գնահատել այդ այցերի ընթացքում արված սելֆիների և համտեսած խորտիկների քանակով…