ՔՊ «ոչ պաշտոնական ստորաբաժանումը» անցավ գործի. ի՞նչ են ծրագրել «սորոսականները»

Ինչպես գիտենք, հուլիսի 6-ին տեղի ունեցավ «Ռեստարտ» գիտակրթական-բարեգործական հիմնադրամի բացման արարողությանը: «Ռեստարտ»-ն առաջին ուսանողաստեղծ հիմնադրամն է: Այն հնարավորություն կտա ուսանողներին ոչ միայն փոխհատուցել իրենց ուսանողական վարձերը, այլ նաև ստանալ դրամաշնորհներ և կրթաթոշակներ: Հիմնադրամին կարող են դիմել նոր բուհ ընդունված ուսանողները, բակալավրում, մագիստրատուրայում, ասպիրանտուրայում սովորող ուսանողները, իսկ գումար կարող է փոխանցել ցանկացած անձ: Ոչինչ չի՞ հիշեցնում:»

Իհարկե հիշեցնում է. Հայաստանի երիտասարդական հիմնադրամը, որի գլուխը ամիսներ առաջ կերան նոր իշխանությունները՝ հիմնադրամը ներքաշելով քրեական գործի մեջ. սցենար, որը կիրառվեց նախորդ իշխանությունների օրոք ձևավորված և գործող գրեթե բոլոր հիմնադրամների հետ: Ժամանակին ընդդիմադիրները, ովքեր այսօր իշխանության ղեկին են, Կարեն Ավագյանի ղեկավարած հիմնադրամը անվանում էին ՀՀԿ ոչ պաշտոնական ստորաբաժանումը, մեղադրում հիմնադրամին ՀՀԿ լոբբինգը անելու, ուսանողների վերբովկայի մեջ և այլն: Սակայն, եթե Հայաստանի երիտասարդական հիմնադրամը ՀՀԿ կցորդն էր, ապա Ռեստարտը հայտնի է, թե ում՝ բոլորիս ոչ անծանոթ Սորոսի, հետևաբար իրավիճակը էլ ավելի ուշագրավ է դառնում:

Փաստորեն Նիկոլ Փաշինյանի և պետական այլ այրերի բարձր հովանու ներքո ստեղծվում է նոր հիմնադրամ, որն էլ դառնալու է ՔՊ ոչ պաշտոնական ստորաբաժանումը: Հասկանալի է, թե ինչ նպատակների է ծառայելու այս հիմնադրամը՝ երիտասարդներին սորոսյան գրանտներով սիրաշահելու, կրթական-գիտական ոլորտը իրենցով անելու: Համակարգ, որի վրա ՔՊ սորոսական սեկտորը շուտվանից աչք ունի, և արդեն իսկ ակնհայտ է, որ արդարադատության ոլորտը սորոսականներին հանձնելուց հետո, հերթը այժմ կրթության ոլորտինն է. ԵՊՀ-ում տեղի ունեցող կադրային ջարդն էլ, որը վերջին օրերին կրկին նոր թափ է հավաքել, ասվածի վառ վկայությունն է...