Սնկերից զանգվածային թունավորումներ Վանաձորում

Հուլիսի 23-ին ՀՀ առողջապահության նախարարությունը «Վանաձորի բժշկական կենտրոն» ՓԲԸ-ից ահազանգ է ստացել այն մասին, որ հիվանդանոց են հոսպիտալացվել թվով 6 հիվանդ:

Ահազանգը ստանալուն պես ՀՀ առողջապահության նախարարության մասնագետների կողմից իրականացված համաճարակաբանական հետազոտության արդյունքում պարզվել է, որ թունավորման պատճառ է հանդիսացել տուժածների կողմից հավաքված սնկերի օգտագործումը սննդում: Բժշկական կենտրոնում տուժածներին ցուցաբերված անհրաժեշտ բժշկական օգնության արդյունքում, բժիշկների գնահատմամբ հիվանդների վիճակը բավարար է:

Լոռու մարզում սնկերից առաջացած թունավորումների դեպքերը կանխարգելելու նպատակով ՀՀ առողջապահության նախարարության մասնագետների կողմից իրականացվել է զանգվածային լրատվամիջոցներով քարոզչական աշխատանք բնակչության շրջանում:

Սնկերի թունավորումից խուսափելու նպատակով ՀՀ առողջապահության նախարարությունը կրկին զգուշացնում է'

• չհավաքել, չգնել ու սննդում չօգտագործել չստուգված սնկեր,

• սունկը գնել միայն շուկայից և խանութից' համապատասխան իրավասու մարմնի կողմից տրված փաստաթղթի առկայության դեպքում,

• երեխաներին և հղի կանանց խորհուրդ չի տրվում սննդում օգտագործել սունկ,

• թունավորման ախտանշաններ ի հայտ գալուն պես շտապ դիմել բժշկի:

Սննդամթերքի անվտանգության ծառայությունից հայտնում են, որ վաճառքի ենթակա սունկը պետք է օրենքով սահմանված կարգով անցնի մասնագետների կողմից իրականացվող պարտադիր սանիտարական փորձաքննություն, որից հետո տրվում է մթերքի անվտանգությունը հաստատող համապատասխան կտրոն։ Սունկ գնելուց առաջ պահանջեք վաճառողից ներկայացնել այն։

Սննդային թունավորումների դեպքում ցուցաբերվող առաջին օգնության հմտություններին ծանոթացեք այստեղ: