Թուրք գեներալները քննարկել են սիրիա-իրանական սպառնալիքները

Այսօր Թուրքիայի զինված ուժերի 15 գեներալներ եւ ադմիրալներ Անկարայում քննարկել են տարածաշրջանի ռազմական եւ քաղաքական իրավիճակը` Մերձավոր Արևելքում տիրող իրավիճակի ֆոնին։ Ինչպես հաղորդում են թուրքական լրատվամիջոցները, հավաքին ներկա են գտնվել Թուրքիայի Զինված ուժերի գլխավոր շտաբի պետ՝ բանակի գեներալ Նեջեթ Օզելը, ցամաքային և օդային զորքերի հրմանատարը, ռազմածովային ուժերի հրամանատարը և ժանդարմերիայի, ինչպես նաև զինված ուժերի այլ բարձրաստիճան ղեկավարներ։

Թուրքական լրատվամիջոցները հայտնել են, որ հանդիպման ժամանակ գեներալները քննարկել են Սիրիայի եւ Իրանի կողմից վերջին օրերին հնչեցրած Թուրքիային հրթիռային հարված հասցնելու բացահայտ սպառնալիքների վերաբերյալ հարցեր։

Նշենք, որ Սիրիան ռուսական արտադրության «Скад» հրթիռային համակարգն ուղղել է Թուրքիայի կողմը։ Հրթիռները տեղակայված են Թուրքիայի և Իրաքի սահմանային գոտում գտնվող Քամիշլի և Այնդիվար շրջաններում։ Այս մասին հաղորդում է իրանական «Press TV» հեռուստաընկերությունը։ Միեւնույն ժամանակ նույն աղբյուրը հաղորդում է, որ այս ամենը տեղի է ունենում թուրք–իրանական հարաբերությունների անկանխատեսելի վատթարացման ֆոնին։ Հիշեցնենք, որ անցյալ շաբաթ Իրանի ռազմաօդային ուժերի հրամանատար, գեներալ Ալի Ամիր Հաջիզադեն բացահայտ սպառնացել էր Անկարային, որ Իրանը պատրաստ է հրթիռային հարվածներ հասցնել Թուրքիայում  տեղակայված ՆԱՏՕ-ի հակահրթիռային պաշտպանության համակարգերի ուղղությամբ։ Հաղորդում է REGNUM լրատվական գործակալությունը։