Թուրքիան կփակի Սիրիայի հետ իր սահմանը

Թուրքիան հուլիսի 25-ին կփակի Սիրիայի հետ սահմանը, հաղորդում է թուրքական NTV հեռուստաընկերությունը։ Ինչպես հայտարարել է Թուրքիայի մաքսերի և առևտրի նախարարությունը, մինչև օրվա վերջը բոլոր սահմանակետերը կդադարեցնեն աշխատանքը: NTV-ն բացատրում է իշխանությունների այս քայլն այն հանգամանքով, որ վերջիններս ձգտում են տնտեսական ճնշում գործադրել Սիրիայի վրա։ Տեղեկատվության պաշտոնական հաստատում դեռ չի եղել։

Հիշեցնենք, որ նախօրեին Սիրիայի ապստամբները գրավել են թուրք-սիրիական սահմանային մի քանի անցակետեր, հաղորդում էր Reuters-ը: Արդյոք Թուրքիայի իշխանությունների՝ սահմանը փակելու մասին որոշումը կապված է այս հագամանքի հետ, չի նշվում։ Բացի այդ, հուլիսի 24-ին հայտնի դարձավ, որ Բաշար ալ-Ասադի կառավարությունը քիմիական զենք է տեղակայել սահմանամերձ քաղաքներում՝ սպառնալով միջամտության դեպքում օգտագործել այն արտասահմանցի զինծառայողների դեմ: Նշվում էր նաև, որ Թուրքիան, ի պատասխան, սահմանամերձ տարածքներ զորքեր է ուղարկել, որոնք պատրաստված են քիմիական զենքին հակազդելու համար։

Հիշեցնենք, որ Սիրիայում Բաշար ալ-Ասադի ռեժիմի դեմ պստամբությունը սկսվել է 2011 թ մարտ ամսին։ Ըստ իրավապաշտպան կազմակերպությունների, հակամարտության զոհ է դարձել առնվազն 17,000 մարդ: Տասնյակ հազարավոր մարդիկ փախել է հարևան երկրներ, այդ թվում՝ Թուրքիա։ Հուլիսի 23-ին սիրիացի փախստականների համար իրենց սահմաններն են բացել նաև Իրաքը և Հորդանանը։