Հիլարի Քլինթոնը Ասադին առաջարկում է հեռանալ

ԱՄՆ պետքարտուղար Հիլարի Քլինթոնը կանխատեսում է սիրիական ընդդիմության անխուսափելի հաղթանակը և հիշեցնում է նախագահ Բաշար ալ-Ասադին, որ նա դեռ ունի հնարավորություն համաձայնեցնելու իր հրաժարականը։

Այս հայտարարությունը առիթ է տալիս ամերիկացի դիտորդներին եզրակացնելու, որ Վաշինգտոնը նախընտրում է շարունակել խուսափել ուղղակի միջամտությունից, չնայած հայտնի ամերիկացի քաղաքական գործիչների՝ սիրիական ընդդիմությանը առավել շոշափելի աջակցություն ցուցաբերելու մասին կոչերին։

Հաիթիի վարչապետի հետ համատեղ մամուլի ասուլիսի ժամանակ Հիլարի Քլինթոնը առաջին անգամ մանրամասն անդրադարձել է Վաշինգտոնի տեսանկյունից հակամարտության հետագա ընթացքին.

«Մենք պետք է առավել սերտ համագործակցենք ընդդիմության հետ, քանի որ նրա վերահսկողության տակ է անցնում Սիրիայի մեծ մասը։ Արդյունքում դա կհանգեցնի բնակչության համար նոր թաքստոցների ստեղծման, որոնք կդառնան բազա ընդդիմության գործողությունների համար։ Մենք հավատում ենք, որ Ասադի վարչակարգը դեռ կարող է սկսել գործընթաց, որը կհանգեցնի բանակցությունների միջոցով բռնության դադարեցման»։ 

Այնուամենայնիվ, Քլինթոնը հայտարարել է, որ Միացյալ Նահանգները պատրաստվում է «հետասադյան» դարաշրջանին. համագործակցում են ընդդիմության հետ՝ ապահովելու Սիրիայում քիմիական զենքի պահեստների անվտագությունը, ինչպես նաև օգնելու ապստամբներին ստեղծել երկրի կառավարման համակարգ և ներկայիս ռեժիմի փլուզումից հետո ապահովել բոլոր սիրիացիների իրավունքները։