Չի´ կարելի հարստանալ՝ մտնելով փախստականների գրպանը. ամոթանքի ակցիա ընդդեմ «Արմավիայի»

Այսօր բազմաթիվ քաղաքացիներ բողոքի ակցիա էին անցկացնում «Արմավիա» ավիաընկերության գլխավոր գրասենյակի դիմաց՝ պահանջելով վերանայել Երևան-Հալեպ-Երևան չվերթի արժեքը։ Նշենք, որ Սիրիայի ներքաղաքական վիճակի վատթարացմանը զուգահեռ մեծանում է Հայաստանում հանգրվանել ցանկացող սիրիահայերի թիվը, իսկ «Արմավիա» ավիաընկերությունը բավական բարձրացրել է Երևան-Հալեպ-Երևան չվերթի տոմսերի գինը։

Հավաքված ցուցարարները կրում էին «Ամո´թ» գրությամբ պաստառներ։

Քաղաքացիական ակտիվիստ Նվարդ Մանասյանն ասաց. «Ես կոչս ուղղում եմ «Արմավիայի» ղեկավարությանը, որը համարվում է ազգային ավիափոխադրող։ Մենք տարիներ շարունակ հանդուրժել ենք, որ գոնե մեկ ազգային փոխադրող ունենանք։ Հիմա իր ազգային լինելն «Արմավիան» ամբողջովին տապալեց. երբ մեր սիրիահայ հայրենակիցները մեծ խնդիրներ ունեն և չեն կարողանում գալ Հայաստան, մոռանալով, որ իրենք նաև ազգային են, փող են դիզում էդ մարդկանց ու նրանց տառապանքի հաշվին։ Մենք ձեզ կոչ ենք անում հասկանալ, թե ինչ է ազգայինը, և քանի որ դուք պաշտպանված եք եղել հավասար մրցասկցությունից, այդ առավելությունը դնել ի սպաս հայ ժողովրդի։ Եթե հիմա չկարողանաք ապացուցել, որ դուք ազգային եք, դուք մեզ ընդհանրապես պետք չեք։ Վաղը, Աստված մի արասցե, եթե ուրիշ խնդիրներ լինեն, դուք ընդհանրապես չեք կարողանալու մասնակցել էդ դժբախտություննրի լուծմանը։ Ինչո՞վ եք դուք ազգային, ինչո՞վ եք դուք ազգային անվտանգության համար պահվում որպես ազգային ավիափոխադրող։ Մենք պահանջում ենք, որպեսզի թողնեք ազատ, շուկայական տնտեսության հիմար փաստարկումները։ Մենք գիտենք, որ դուք լավ էլ շուկայից դուրս եք ու պաշտպանված։ Սիրիահայերի վիճակը տեսնելով՝ դուք պարտավոր եք մարդկային լինել։ Որտե՞ղ է ձեր սոցիալական պատասխանատվությունը։ Այս պահին մենք ռեալ խնդիր ունենք, և եթե չեք կարողանում իրական քաղաքականություն վարել, ուրեմն թող գրողի ծոցը կորչի ձեր ազգային լինելը. կոչվեք ուղղակի «Արմավիա» և հավասար պայմաններով մասնակցեք միջազգային մրցակցությանը»։

«Արաբական ավիաուղիները ևս կարող էին թանկացնել տոմսերի գները, սակայն այնտեղ գնային տատանումը չնչին էր, քանի որ՝ թասիբ, նամուս, աբուռ բառերը հասկանալի են նաև արաբերենով, իսկ «Արմավիա»-ն դա չունի: Հայաստանը շատ դժվար օրեր է ունեցել՝ երկրաշարժ, պատերազմ, տնտեսության փլուզում, և հենց այդ դժվարին օրերին մեր կողքին են եղել Սփյուռքահայերը, ի մասնավորի՝ սիրիահայերը։ Եվ եթե մենք հիմա հանդուրժենք «Արմավիայի» էս պահվածքը, դա կլինի ապերախտություն: «Արմավիան» Հայաստանում միակ կառույցն է, որ արձագանքեց սիրիական դեպքերին և մտածեց, որ «կակ ռազ» հարմար առիթ է տոմսերը թանկացնելու համար ու մարդիկ իրենց վերջին կոպեկն էլ կտան իրենց բարեկամներին Հայաստան տեղափոխելու համար։ Չի´ կարելի հարստանալ՝ մտնելով փախստականների գրպանը»,- նշեց Ապրես Զոհրաբյանը։

Ցուցարարները հայտարարեցին, որ բոյկոտում են «Արմավիայի» ցանկացած ծառայություն, քանի դեռ չի փոխվել ընկերության քաղաքականությունը։
«Ինձ պարտավորված եմ համարում չօգտվել «Արմավիայի» նման անթասիբ կազմակերպությունից»,-ասաց ցուցարարներից մեկը։

Նշենք, որ «Արմավիայի» ներկայացուցիչներից ոչ ոք չմոտեցավ ակցիայի մասնակիցներին։