ՀՀ մշակույթի նախարարն ընդունել է Իրանի դեսպանին

Այսօր, ՀՀ մշակույթի նախարար Հասմիկ Պողոսյանն ընդունել է ՀՀ-ում Իրանի Իսլամական Հանրապետության նորանշանակ արտակարգ և լիազոր դեսպան Մոհամմադ Ռեիսիին: Շնորհավորելով հյուրին պաշտոնը ստանձնելու առթիվ, նախարարը նշել է, որ հայ-իրանական մշակութային հարաբերությունները գտնվում են բարձր մակարդակի վրա, համոզմունք հայտնելով, որ հետագա համագործակցությունը կունենա իր արժանի շարունակությունը: Զրույցի ընթացքում նախարարն անդրադարձել է երկու երկրներում իրականացրած համատեղ մշակութային ծրագրերին, մասնավորապես' գրական-թարգմանական նախագծերին, որոնք նպաստել են «Հայաստան-Իրան. գրական կամուրջների» ստեղծանը և ապահովել ամուր հարթակ գրողների փոխայցելությունների և գրական ծրագրերի իրականացման համար: Առաջիկա ծրագրերի իրականացման համատեքստում նախարարն անդրադարձել է Մեղրիում 2011 թվականին անցկացրած Հայաստանի Հանրապետության և Իրանի Իսլամական Հանրապետության միջև բարեկամության 20-ամյակին նվիրված հայ-իրանական բարեկամության օրերին և առաջարկել դեսպան Մոհամմադ Ռեիսիին ծրագիրը դարձնել շարունակական: Այնուհետև, կողմերը քննարկել են աշնանը Հայաստանում իրանցի հայտնի երգչուհի Փառի Զանգանեի բարեգործական համերգները կազմակերպելու հարցը: Առաջիկա համատեղ ծրագրերի շրջանակներում Հասմիկ Պողոսյանը կարևորել է հայ-իրանական համագործակցությունը միջազգային կազմակերպությունների, մասնավորապես, ՅՈՒՆԵՍԿՕ-ի ձևաչափով, առաջարկելով իրանական կողմին մշակել համատեղ հայտեր ոչ նյութական մշակութային ժառանգության ոլորտում: Օգտագործելով հայ-իրանական գրական կապերի հարուստ փորձը, նախարարն առաջարկել է այս տարի իրականացնել դրամատուրգիական ստեղծագործությունների թարգմանություններ: Իր կողմից դեսպանն առաջարկել է պարսկերենից թարգմանել Սաադիի ստեղծագործությունները' հայ ընթերցողին ներկայացնելու համար: Հանդիպման վերջում դեսպան Մոհամմադ Ռեիսիին շնորհակալություն է հայտնել նախարար Հասմիկ Պողոսյանին ջերմ ընդունելության, հայ-իրանական մշակութային ձեռնարկներին մշտապես գործուն աջակցություն ցուցաբերելու և երկու երկրների միջև պատմականորեն ձևավորված մշակութային հարաբերությունները պատշաճ մակարդակի վրա պահելու համար: