Եվրոգոտու ճգնաժամը հասնում է Ռուսաստանին. The Wall Street Journal

Վերակառուցման և զարգացման եվրոպական բանկի կանխատեսումներով ռուսական տնտեսությունը ավելի ու ավելի է հայտնվում եվրոգոտու հարկային և բանկային ճգնաժամի ազդեցության տակ ապրանքների գների նվազման պատճառով,-գրում է The Wall Street Journal–ը։

Ըստ ՎԶԵԲ–ի եվրոգոտու տնտեսության վերաբերյալ ներկայացրած վերջին զեկույցի, ֆինանսատնտեսական ճգնաժամը շարունակում է տարածվել և խորանալ դեպի արևելք և կազդի Ռուսաստանի տնտեսության վրա։ 

«Արևելքի երկրների և Ռուսաստանի վրա բացասական ազդեցություն կարող է ունենալ երկու հիմնական ուղիներով՝ ապրանքների գների կտրուկ նվազեցմամբ և ռիսկերը նվազեցնելու ընդհանուր պատրաստակամությամբ», – նշել է ՎԶԵԲ–ի ներկայացուցիչ Պիրոսկա Նադը։ 

Ըստ ՎԶԵԲ–ի մայիսյան կանխատեսումների՝ Ռուսաստանի տնտեսությունը պետք է 4,2% աճ գրանցի 2012–ին, իսկ 2013–ին՝ 4,3%։ Իսկ բանկի վերջին զեկույցում այդ կանխատեսումները նվազել են համապատասխանաբար մինչև 3,1% և 3,3%,- նշված է պարբերականում։ 

«ՎԶԵԲ–ի կանխատեսումները հիմնված են եվրոգոտու ճգնաժամի տարածման և մոտ ապագայում ճգնաժամից դուրս գալու հեռանկար չլինելու վրա, ինչի պատճառով եվրոգոտու խոշոր տնտեսությունները, ինչպիսիք են՝ Իտալիան և Իսպանիան, կկորցնեն միջազգային շուկայում արժեթղթերի վաճառքի հնարավորությունից, որն էլ իր հերթին այդ երկրի խոշոր բանկերի լուծարման վտանգի առաջ կկանգնեցնի», – նշել է հոդվածագիրը։ 

ՎԶԵԲ–ի զեկույցում նշված է, որ եվրոգոտու ճգնաժամի խորացման դեպքում Ռուսաստանի տնտեսական աճն ավելի կնվազի։ Բանկի կանխատեսումներն ավելի ուշ տեղ են գտել Moody's–ի զեկույցում, որտեղ նշված է, որ Ռուսաստանի տնտեսությունը առաջիկա 10-12 ամիսների ընթացքում կարող է մինչև 5% նվազել, իսկ ռուսական ռուբլին մինչև 30% արժեզրկվել եվրոգոտու ճգնաժամի խորացման դեպքում։ 

«Ճգնաժամի տարածման միտում է նկատվում նաև Եվրոպայի հարավային ուղղությամբ, որը կարող է հասնել ընդհուպ Հյուսիսային Աֆրիկայի երկրներ։ Հատկանշական է, որ այդ երկրները քաղաքական տրանսֆորմացիաների պատճառով բարդ տնտեսական իրավիճակում են հայտնվել»,  – նշված է պարբերականում։   

Կենտրոնական և Հարավային Եվրոպայի երկրներում 2012–ի ընթացքում տնտեսական աճ չի արձանագրվել, միևնույն ժամանակ վտանգ կա, որ 2013–ին դրանք դեռ կնվազեն։ ՎԶԵԲ–ի զեկույցում նշված է, որ եվրոգոտու ճգնաժամի անորոշությունը լուրջ վտանգ է ներկայացնում այն երկրների համար, որոնք վարկավորվում են ՎԶԵԲ–ի կողմից։  

«Դա երկարատև բացասական ազդեցություն կարող է ունենալ տնտեսական աճի վրա, ինչը կարող է ազդել եվրոգոտու երկրների մրցունակության վրա՝ ասիական և լատինաամերիկյան երկրների հետ մրցակցության պարագայում», – գրում է հոդվածագիրը։