Օգտվելով մաքսատանը քաղաքացու ինքնավնասման փորձից՝ շատ քաղաքացիներ բեռները փախցրել են

Բագրատաշենի մաքսակետում բեռը մաքսազերծելու օրինական պահանջին ընդդիմացած և ինքնավնասման փորձ կատարած քաղաքացու բեռն ամբողջ ծավալով մաքսազերծվել է: Այդ մասին կառավարության նիստից հետո լրագրողների հետ զրույցում նշեց Պետական եկամուտների կոմիտեի նախագահ Դավիթ Անանյանը՝ ավելացնելով, որ քաղաքացին ստացել է լիարժեք բուժօգնություն:

«Բեռն ամբողջ ծավալով մաքսազերծվել է: Նա վերցրել է բեռն ու գնացել»,- ասաց Դավիթ Անանյանը:

Դիտարկմանն՝ արդյոք դա շոո՞ւ է եղել, ՊԵԿ նախագահը նշեց, որ չէր ցանկանա այդպիսի որակում տալ, մինչդեռ այդ դեպքին հետևել են այլ իրադարձություններ:

«Այդ գործընթացի ժամանակ, երբ մեր բոլոր ծառայողները զբաղված են եղել կամ օգնություն ցույց տալով կամ ուշադրությունը շեղվել է, շատ հայրենակիցներ օգտվել են իրավիճակից և բեռները փախցրել են: Կարծում եմ՝ մեկը մյուսի հետ կապ չունի, այդ շոուն չէին կազմակերպել, որ կարողանային բեռներ տանել, բայց ուզում եմ ուշադրությունը հրավիրել նրան, որ մեր կողքին կան մարդիկ, որոնք օգտվում են իրավիճակից», - նկատեց ՊԵԿ նախագահը:

Ի պատասխան Բագրատաշենի մաքսակետի աշխատակիցների ՀՀ ներմուծած մոտ 1 տոննա միրգը մաքսազերծելու օրինական պահանջի, քաղաքացին փորձել էր խուսափել բեռի որոշ մասը ձևակերպելուց` ինքնավնասման դիմելու միջոցով:

Մաքսային մարմինների աշխատակիցները քաղաքացուն տեղափոխել են Նոյեմբերյանի հիվանդանոց, որտեղ անհրաժեշտ բուժօգնություն ստանալուց հետո քաղաքացին վերադարձել է մաքսակետ, ավարտել մաքսային ձևակերպման աշխատանքները, ստացել իր բեռը և հեռացել: