«Հրապարակ». ԵՊՄՀ–ի ռեկտորն որոշել է ազատվել 65-ն անց դասախոսներից

Խաչատուր Աբովյանի անվան մանկավարժական համալսարանի ռեկտոր Ռուբեն Միրզախանյանը որոշել է ազատվել իր մի շարք ամբիոնների 65-ն անց դասախոսներից, թեև նրանք ունեն համապատասխան կոչումներ և դասավանդման բավական երկար տարիների փորձ:

Համալսարանի ամբիոններից մեկի դասախոսը (նա չի ցանկացել, որ իր անունը հրապարակվի, քանի որ դեռ հույս ունի մասնակցել օգոստոսին կազմակերպվող մրցույթին) թերթի հետ զրույցում ասել է, որ ռեկտորի կողմից դեկաններին և ամբիոնի վարիչներին ներքին հրահանգ է եղել՝ «հասկացնել» տարեց դասախոսներին, որ իրենք չեն կարող այլևս մասնակցել օգոստոսին հայտարարվող նոր մրցույթին:

Իսկ որոշ հաշվարկով՝  այդպիսի խտրական վերաբերմունք դրսևորելու դեպքում մոտ 50 հոգի դուրս կմնան համալսարանից:

«Բայց չէ՞ որ այդ աշխատանքով ես իմ ընտանիքն եմ պահում»,- վրդովված դժգոհել է դասախոսը: Վերջինիս փոխանցմամբ՝ այս ամենի նպատակն այն է, որ որոշ դեկաններ ցանկանում են իրենց ծանոթներին տեղավորել աշխատանքի: «Իրենց ախպերությանն են ուզում բերել»,-բացատրել է նա:

Սակայն համալսարանի ռեկտորը՝ Ռուբեն Միրզախանյանը, թերթի հետ զրույցում այդպես էլ հստակ որևէ բան չի ասել: Նմանատիպ խոսակցություններն անլուրջ է որակել և բացատրել, թե ընդհանրապես ինչպես է տեղի ունենում մրցույթի կազմակերպման ընդհանուր գործընթացը: «Ոչ մեկը ոչ մեկից ազատվելու խնդիր չունի: Հայտարարվում է մրցույթ: Մրցույթը չի ենթադրում տարիքային սահմանափակում: Սա ընդհանուր կարգ է, որը կիրառվում է ոչ միայն Մանկավարժական համալսարանում, այլև երկրի բոլոր բարձրագույն ուսումնական հաստատություններում»,-ասել է Միրզախանյանը: