Սիրիայի ևս երկու դեսպան հրաժարվել են ծառայել Ասադի ռեժիմին

ԱՄՆ-ի իշխանությունները հաղորդել են, որ Սիրիայի ևս երկու դեսպան հրաժարվել են ծառայել Բաշար ալ-Ասադի ռեժիմին և փախել են Կատար։ Խոսքը ամուսնական զույգի մասին է՝ Արաբական Միացյալ Էմիրություններում Սիրիայի դեսպան Աբդել Լատիֆ Դաբաղի և նրա կին՝ Կիպրոսում Սիրիայի դեսպան Լամիա Հարիրի։

Երկու շաբաթ առաջ նդդիմության կողմը անցնելու մասին հայտարարեց Իրաքում Սիրիայի դեսպան Նավաֆ Ֆարեսը: «Մենք կարող ենք հաստատել, որ ԱՄԷ-ում և Կիպրոսում Սիրիայի դեսպանները անցել են ընդդիմության կողմը», - լրագրողներին հայտնել է Սպիտակ Տան ներկայացուցիչ Ջեյ Քարնին։

Ըստ Քարնիի, դեսպանների այս քայլը ցույց է տալիս, որ «Բաշար Ասադին մոտ կանգնած բարձրաստիճան պաշտոնյաները փախչում են ռեժիմի՝ սեփական ազգի հանդեպ սարսափելի վերաբերմունքից նաև գիտակցելով, որ Ասադի օրերը հաշվված են։ Հաղորդվում է նաև Օմանում Սիրիայի դեսպանատան ռազմական կցորդ Մուհամեդ Թահսեն Ֆաքիրի՝ ընդդիմության կողմը անցնելու մասին։

Ինչպես AFP լրատվական գործակալությանը հայտնել է ԱՄՆ պետդեպարտամենտի բարձրաստիճան ներկայացուցիչը, «այս իրադարձությունները ցույց են տալիս, որ հողը փախչում է սիրիական ռեժիմի ոտքերի տակից։ Ռեժիմը քայքայվում է և կորցնում վերահսկողությունը իրավիճակի վրա»:

Ավելի վաղ ՄԱԿ-ի գլխավոր քարտուղար Պան Կի Մունը հայտարարել է, որ աշխարհը պետք է գործադրի բոլոր ջանքերը Սիրիայում արյունահեղությունը դադարեցնելու համար։ Սակայն ՄԱԿ-ի Անվտանգության խորհրդի անդամները դեռևս չեն կարողանում համաձայնության գալ Սիրիայի ճգնաժամի վերաբերյալ միասնական դիրքորոշման հարցում։