ՄԱԿ-ը կոչ է անում դադարեցնել արյունահեղությունը Սիրիայում

ՄԱԿ-ի գլխավոր քարտուղար Պան Կի Մունը հայտարարել է, որ աշխարհը պետք է գործադրի բոլոր ջանքերը Սիրիայում արյունահեղությունը դադարեցնելու համար։ Ըստ ՄԱԿ-ի գլխավոր քարտուղարի, ինչպես հաղորդում է BBC-ի ռուսական ծառայությունը, աշխարհը պետք է արձագանքի միջազգային մարդասիրական իրավունքի կոպտագույն խախտումներին, ինչպես եղավ Լիբիայի և Փղոսկրի Ափի դեպքում։

Նշենք, որ անցյալ տարի ՄԱԿ-ը հավանություն է տվել այս երկրներում քաղաքացիների պաշտպանության համար միջամտությանը: Դամասկոսը սպառնացել է քիմիական զենք կիրառել, սակայն, ըստ Սիրիայի արտաքին գործերի նախարարության պաշտոնական ներկայացուցիչ Ջիհադ Մաքդիշի, դա տեղի կունենա միայն արտաքին ագրեսիայի դեպքում։

Ավելի վաղ արդեն հայտնի դարձավ, որ Սիրիայում ՄԱԿ-ի դիտորդների մոտ կեսը լքել է երկիրը։

Հիշեցնենք, որ Սիրիայում Բաշար ալ-Ասադի ռեժիմի դեմ պստամբությունը սկսվել է 2011 թ մարտ ամսին։ Ըստ իրավապաշտպան կազմակերպությունների, հակամարտության զոհ է դարձել առնվազն 17,000 մարդ: Տասնյակ հազարավոր մարդիկ փախել են հարևան երկրներ, այդ թվում՝ Թուրքիա։ Հուլիսի 23-ին սիրիացի փախստականների համար իրենց սահմաններն են բացել նաև Իրաքը և Հորդանանը։