Սիրիայում ԿՀՎ գործակալների բացակայությունն ԱՄՆ-ի բացթողումն է. Los Angeles Times

ԱՄՆ–ի Կենտրոնական հետախուզական վարչության (ԿՀՎ) գործակալների բացակայությունը Սիրիայում ԱՄՆ–ի իշխանությունների համար դժվարություններ է ստեղծում ընդդիմադիր խմբավորումների գործունեության վերաբերյալ բավարար տեղեկություններ ստանալու առումով, գրում է Los Angeles Times–ը։

Ըստ ԱՄՆ–ի իշխանության բարձրաստիճան պաշտոնյաների՝ այդ փաստը խիստ սահմանափակում է բավարար տեղեկություններ ստանալու և տեղի ունեցող իրադարձությունների վրա լուրջ ազդեցություն գործելու առումով։ Սիրիայում 16 ամիս առաջ սկսված հակակառավարական բողոքի ցույցերի ընթացքում ԱՄՆ–ի կառավարությունը բարբերաբար փորձում է տեղեկություններ հավաքել գործող ընդդիմադիր խմբավորումների և դրանց իրական նպատակների վերաբերյալ, նշված է հոդվածում։ 

Թեև ամերիկացի բարձրաստիճան պաշտոնյաները լուրջ կապեր ունեն Բաշար Ասադի ռեժիմի դեմ մարտնչող ընդդիմադիր զինված խմբավորումների հետ։ Վերլուծաբանների մեծամասնության կարծիքով Ասադի ռեժիմի տապալումից հետո Սիրիայի նոր կառավարության հիմնական ուժերը լինելու են զինված խմբավորումները։ ԿՀՎ գործակալների կողմից Սիրիայի ռազմական գոտիներում հատուկ առաջադրանքներ իրականացնելու համար լուրջ խոչընդոտ է հանդիսանում փետրվարին անվտանգության նկատառումներով Դամասկոսում ԱՄՆ–ի դեսպանության գործունեության դադարեցումը։ Դրանից հետո ԿՀՎ–ն մնացել է առանց հուսալի հիմքի, որի հիման վրա միայն կարելի է այդ երկրում հատուկ առաջադրանքներ իրականացնել։ Դեսպանության գործունեության դադարեցումից հետո ԱՄՆ–ի ԿՀՎ–ի բոլոր գործակալները լքել են Սիրիան, նշված է հոդվածում։ Քննադատների կարծիքով, Սիրիայում ԿՀՎ գործակալների բացակությունը լուրջ հնարավորություն է ապստամբական շարժումը խոչընդոտելու և հետագայում այն տարածվելու հնարավորությունը կանխելու առումով։ 

«Մենք այժմ բավականին շատ տեղեկություններ ունենք Սիրիայի ընդդիմության վերաբերյալ, քան մեկ ամիս առաջ, և ավելի շատ, քան վեց ամիս առաջ։ Այդ ամենին մենք հասել ենք՝ շնորհիվ դիվանագիտական հարաբերությունների և մի շարք այլ միջոցների, որոնց մասին չեմ կարող բարձրաձայնել», – հայտարարել է ԱՄՆ նախագահ Բարաք Օբամայի վարչակազմի ներկայացուցիչը։

ԱՄՆ–ի Ներկայացուցիչների պալատի հետախուզության հարցերով կոմիտեի ղեկավար Մայք Ռոջերսը նշել է, որ ԱՄՆ–ը Սիրիայի իրադարձությունների ակտիվ մասնակցություն ունենալու այլընտրանք չունի, հաշվի առնելով Մերձավոր Արևելքում «Ալ–Կաիդա»–ի ազդեցության մեծացումը։ 

ԱՄՆ–ի որոշ պաշտոնատար անձինք պնդում են, որ Սիրիայում ամերիկացի հետախույզների պակասն ավելացնում է ԱՄՆ–ի վարչակազմի մտահոգությունն առ այն, որ իր գործակալը կարող է վիրավորվել և կամ առևանգվել։ Մինչ վերջերս, ԿՀՎ–ն ուղիղ կապ չէր պահում ապստամբական խմբավորումների հետ՝ նրանց հետ կապը պահելով թուրքական, կատարական, սաուդյան և այլ երկրների հետախուզական ծառայությունների գործակալների միջոցով։ 

Ի տարբերություն Լիբիայի, Սիրիայի ապստամբական խմբավորումները չեն տիրապետում ԿՀՎ գործակալների գտնվելու վայրի մասին տեղեկությունների և ռազմաբազաների վրա հարձակումներ են գործում պատահականության սկզբունքով։ Բացի այդ ապստամբներին միջազգային ռազմական օժանդակության բացակությունն ավելի վտանգավոր է դարձնում ԱՄՆ գործակալների անվտանգությունը, նշված է հոդվածում։