Ղրղզստանում կալանք է դրվել Աթամբաեւի բոլոր հաշիվների վրա

Ղրղզստանում կալանք է դրվել երկրի նախկին նախագահ Ալմազբեկ Աթամբաևի բոլոր հաշիվների վրա, որը 12 քրեական գործերի ֆիգուրանտ է: Այդ մասին օգոստոսի 16-ին հայտնել է հանրապետության գլխավոր դատախազության մամուլի ծառայությունը: «Քրեական այն գործերի հետաքննության շրջանակում, որոնց ֆիգուրանտ է Ալմազբեկ Աթամբաևը, կալանք է դրված գույքի, արժեթղթերի, բաժնետոմսերի, Ղրղզստանի Հանրապետության բանկերում առկա բոլոր հաշիվների վրա»,- հայտարարել են մամուլի ծառայությունում:

Հսկիչ մարմնի տվյալներով՝ կալանք է դրված նաև նախկին նախագահի կնոջ՝ Ռաիսա Աթամբաևայի ամբողջ ունեցվածքի ու հաշիվների, ինչպես նաև Աթամբաևի հետ կապված ընկերությունների ունեցվածքի վրա, որոնց թվում են՝ «Ղրղզավտոմաշ»-ը, «Ապրիլ» հեռուստաալիքը, «Մեդիաֆորում» բաց բաժնետիրական ընկերությունը և ուրիշներ:

Ավելի վաղ Ղրղզստանի դատարանը փակ նիստում չի բավարարել երկրի ձերբակալված նախկին նախագահ Ալմազբեկ Աթամբաևի նկատմամբ խափանման միջոցը փոխելու պաշտպանության խնդրանքը, ինչի մասին լրագրողներին հայտնել է նրա փաստաբան Սերգեյ Սլեսարյովը:

Աթամբաևին կասկածում են մի քանի ծանր հանցագործությունների մեջ, այդ թվում՝ զանգվածային անկարգություններ կազմակերպելու և օգոստոսի 7-8-ին տեղի ունեցած իրադարձությունների ժամանակ սպանության փորձի, ինչպես նաև կոռուպցիայի մեջ՝ Բիշքեկի ջերմաէլեկտրակենտրոնն արդիականացնելիս և ջերմակենտրոնին ածուխ մատակարարելիս: Բացի այդ, պետության նախկին ղեկավարին կասկածում են անօրինական հարստացման, փողերի լվացման և լեռնարդյունահանման ճյուղում թույլատրագրեր տալիս կոռուպցիայի մեջ: Նաև Աթամբաևին վերագրում են Բիշքեկում «Ֆորում» շենքի անօրինական սեփականաշնորհումը, որտեղ գտնվում են նրա կողմից հիմնված Սոցիալ-դեմոկրատական կուսակցության կենտրոնակայանը և նրան պատկանող «Ապրիլ» հեռուստաալիքը, ինչպես նաև Կոյ-Տաշ գյուղում անօրինականորեն հողամաս ձեռք բերելը: Բացի այդ, նախկին նախագահին կապում են վեց տարի առաջ քրեական հեղինակություն Ազիզ Բաթուկաևի անօրինական ազատման հետ: