Անսպասելի հանգուցալուծում. ռուսական կողմի մեսիջը՝ Փաշինյանին

Վերլուծական 17 Օգոստոս, 2019 20:00

ՌԴ գլխավոր դատախազությունը մերժել է ՀՀ ԱԺ նախկին պատգամավոր Միհրան Պողոսյանին քրեական հետապնդման ենթարկելու նպատակով հանձնելու մասին ՀՀ գլխավոր դատախազության միջնորդությունը: Այսինքն՝ Մոսկվան չի արտահանձնի Միհրան Պողոսյանին: ՌԴ գլխավոր դատախազությունը հիմք է ընդունել «Քաղաքացիական, ընտանեկան և քրեական գործերով իրավական օգնության և իրավական հարաբերությունների մասին» 22.01.1993թ. Կոնվենցիայի 19-րդ հոդվածի դրույթները:

«Կոնվենցիայի վերը նշված հոդվածը՝ որպես իրավական օգնություն ցույց տալու խնդրանքը լրիվ կամ մասնակիորեն մերժելու հիմք նախատեսում է այն դեպքերը, եթե այդպիսի օգնության ցուցաբերումը կարող է վնաս հասցնել հարցվող (կոնկրետ դեպքում՝ հանձնման միջնորդությունը քննարկող) Պայմանավորվող Կողմի ինքնիշխանությանը կամ անվտանգությանը կամ հակասում է նրա օրենսդրությանը», տեղեկացրել է ՀՀ դատախազության հանրային կապերի բաժնի պետ Արևիկ Խաչատրյանը: Ստացվում է, որ Միհրան Պողոսյանին արտահանձնելու դեպքում վտանգի տակ է դրվելու ՌԴ ինքնիշխանությունը և անվտանգությունը: Բերված հիմքը իհարկե կարող է տարօրինակ թվալ, սակայն պետք է հիշել, որ Պողոսյանի նկատմամբ հարուցած քրեական գործը վերաբերվում է օֆշորներին՝ այստեղ արդեն ամեն բան իր տեղն է ընկնում, քանի որ գործ ունենք քաղաքական-ֆինանսական լուրջ հանգամանքների, այնպիսի թնջուկի հետ որն անգամ իրավապահները մինչև վերջ դեռ չեն քանդել: Պողոսյանը ունի տեղեկություն, որը կարող է ռուսական կողմի համար օգտակար լինել, իսկ այդ տեղեկության տարածումը՝ վնասել ՌԴ անվտանգությանը:

Մյուս կողմից՝ ռուսական կողմի նման որոշումը պետք է դիտարկել հայ-ռուսական հարաբերությունների համատեքստում: Որոշումը հրապարակվեց Պատրուշևի՝ Երևան այցելելուց օրեր անց, իսկ սա նշանակում է, որ այս երկու իրադարձությունները այսպես թե այնպես իրար հետ կապված են: Արդյո՞ք Պողոսյանին չարտահանձնելը նախապես համաձայնեցված էր ՀՀ իշխանությունների հետ, այլ կերպ ասած՝ հենց վերջիններս են Պողոսյանին ժերտվա տվել ինչ-ինչ դիվիդենտների դիմաց, թե՞ վերոնշյալ պայմանավորվածությունները տապալվել են, համաձայնության հասնել չի ստացվել և ռուսական կողմի որոշումը պարզապես պատասխան է ՀՀ իշխանություններին…