ՅՈՒՆԵՍԿՕ-ի միջազգային կամավորական ծառայության կոմիտեն (CCIVS) բարձր է գնահատում «Զվարթնոց» պատմամշակութային արգելոց-թանգարանի` երիտասարդության հետ տարվող աշխատանքները

2011 թ. «Զվարթնոց» պատմամշակութային արգելոց-թանգարանի տարածքում աշխատանքների միջազգային կամավորական ճամբար բացելու վերաբերյալ ՀՀ մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի կողմից Հայաստանի ուսանողական ջոկատների հանրապետական շտաբ ներկայացված ծրագիրն արժանացել է «Պատրիմոնիտո` համաշխարհային ժառանգություն» ծրագրի ՅՈՒՆԵՍԿՕ-ի Միջազգային կամավորական ծառայության կոմիտեի (CCIVS) բարձր գնահատականին:

ՅՈՒՆԵՍԿՕ-ի «Պատրիմոնիտո» ծրագրի մասնակից` Հայաստանի ուսանողական ջոկատների հանրապետական շտաբի վարչության և «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի միջև ձեռք բերված պայմանավորվածության համաձայն, կողմերը շարունակելով համատեղ գործունեությունը, 2012 թ. միջազգային ճամբարի կայանատեղի կհիմնեն նաև «Զվարթնոց» պատմամշակութային արգելոց-թանգարանի տարածքում (ՅՈՒՆԵՍԿՕ-ի «Պատրիմոնիտո» ծրագրի շրջանակում գործող նմանատիպ ստացիոնար ճամբարներ աշխարհում մինչ օրս երեքն են):

Այստեղ կայանող կամավորները (թվով 15-ը) արգելոց-թանգարանի տարածքում կմնան շուրջ 15 օր: Միջազգային ճամբարի կեցությունը կապահովի «Պատմամշակութային արգելոց-թանգարանների և պատմական միջավայրի պահպանության ծառայությունը», որը երիտասարդ կամավորներին կներգրավի տարածքի բարեկարգման աշխատանքներին, ինչպես նաև ՊՈԱԿ-ի կողմից կազմակերպվող կրթամշակութային ծրագրերին: